ASTANA. 11 mamyr. Chehııada hokkeıden álem chempıonaty ótip jatqany belgili. Ázirge toptyq kezeń básekeleri ótýde. Keshe túnde taǵy 4 kezdesýdiń nátıjesi belgili boldy. Bul týraly egemen.kz habarlady.
Chempıondyqtan basty úmitker Kanada qatarynan altynshy ret jeńiske jetti. Sondaı-aq, atalǵan quramanyń negizgi qarsylastary AQSh pen Reseı de óz oıyndaryn jeńispen aıaqtady. Álem chempıonatynyń júldesinen úmitkerlerdiń biri, jarysty uıymdastyrýshy el – Chehııa da kezekti úsh upaıyna qol jetkizdi.
Sonymen 10 mamyrda ótken oıyndardyń nátıjeleri tómendegideı:
«A» toby:
Germanııa – Chehııa 2:4 (1:1, 1:2, 0:1);
Shveısarııa – Kanada 2:7 (1:2, 0:3, 1:2).
«V» toby:
Slovenııa – AQSh 1:3 (0:2, 1:0, 0:1);
Slovakııa – Reseı 2:3 (overtaım) (1:0, 0:1, 1:1, 0:1).
Osy oıynnan keıin Kanada 18 upaımen «A» tobyndaǵy kóshbasshylyǵyn odan ári nyǵaıta tústi. Ekinshi jáne úshinshi oryndarda kele jatqan Shvesııa men Chehııanyń enshisinde 13 upaıdan bar. Al pleı-off básekesine ótýge múmkindik beretin 4-satyda ázirge 9 upaıy bar Shveısarııa keledi.
«V» tobyndaǵy jaǵdaıǵa kelsek, keshegi oıynnan keıin AQSh 15 upaımen jeke-dara kósh bastady. Al qarsylasyn overtaımda jeńgeni úshin bir upaı joǵaltqan Reseı 14 upaımen ekinshi orynǵa jaıǵasty. Úshinshi jáne tórtinshi oryndarda Fınlıandııa (12 upaı) men Belarýs (10 upaı) keledi. Bul eki qurama búgin ózara kúsh synasady.
Búgin bolatyn oıyndar kestesi:
«A» toby:
Germanııa – Avstrııa;
Shvesııa – Fransııa.
«V» toby:
Fınlıandııa – Belarýs;
Slovenııa – Danııa.
Chehııadaǵy álemdik doda 17 mamyrda aıaqtalatynyn esterińizge sala keteıik.
Elaman Qońyr.
Derek: egemen.kz.
Sýret: championat.com.
