Foto Depositphotos.com
Bas prokýratýranyń málimetinshe, bıylǵy jyldyń 21 aqpanynda kásipker jumysqa ketip, keıin baılanysqa shyqpaǵan. Bul jaǵdaı onyń habar-osharsyz joǵalǵan dep tanylýyna sebep boldy.
«Sotqa deıingi tergep-tekserý barysynda sol kúni kásipkerdiń Pavlodarda kúdiktimen onyń turǵyn úıiniń aýlasynda kezdeskeni anyqtaldy. Qarjylyq kelispeýshilikterge baılanysty olardyń arasynda janjal týyndap, qaskúnem jábirlenýshiniń keýdesi men betine 22 ret pyshaq suqqan. Jábirlenýshi sol jerde alǵan jaraqattarynan kóz jumǵan», delingen habarlamada.
Qylmystyń izin jasyrý maqsatynda kúdikti marqumnyń denesin jáne avtokóligin garajǵa jasyryp, keıin ózi shetelge qashyp ketken.
Kúdikti naýryz aıynda Reseıde ustalyp, Bas prokýratýranyń suraýy boıynsha elge ekstradısııalandy.
