Reseı aýmaǵynda Qazaqstan poıyzynan jarylǵysh zat tabyldy

QOSTANAI. 11 tamyz. Reseı aýmaǵynda Qazaqstan poıyzynan jarylǵysh zat tabyldy. Bul týraly ng.kz saıytyna silteme jasaǵan egemen.kz tilshisi habarlady. Reseıdiń Qartaly temirjol stansasynda reseılik arnaıy qyzmettiń qyzmetkerleri Qazaqstannan shyqqan júk poıyzyn toqtatqan. Vagondardyń birinen jarylǵysh zat tabylǵan. Kólik qorshalyp, birneshe saǵat boıy tekserilgen. Poıyz túngi 3 pen 4-tiń arasynda toqtatylǵan. 4 saǵattyq izdestirýden keıin júk vagonynan trotıl jarylǵyshy men GPS-treker tabyldy. Kórshi eldegi «Pervyı oblastnoı» saıty qyzmetkeriniń biri: «Trotıldiń qansha ekeni belgisiz. Qazir jedel izdestirý bóliminiń mamandary jarylǵysh zattyń qashan jáne qaı jerde salynǵanyn anyqtap jatyr. Bul jarylǵysh zat poıyz Qazaqstanǵa kelmeı jatyp, burynǵy Keńes odaǵy quramyndaǵy respýblıkalardyń birinde salynǵan bolýy múmkin», – degen boljam aıtqan. Alaıda, bul boljam týraly Reseıdiń federaldy qaýipsizdik qyzmeti (FSB) basqarmasyndaǵylar anyq eshteńe aıtqan joq. Reseıdiń aqparat kózderinde Qazaqstannan barǵan júk poıyzdarynda jarylǵysh zat trotıldiń tabylýy birinshi ret emes ekeni aıtylady. Osydan bir aı buryn  Qartaly temirjol stansasynda Qazaqstannan kelgen taǵy bir júk poıyzy toqtatylǵan bolatyn. Onda da Reseı shekarashylary trotıl jarylǵyshy salynǵan árqaısysy 400 gramdyq eki ydys taýyp alǵan edi. Názıra Járimbetova. Derek: ng.kz. Sýret: vk.com.