Jańa joldyń ashylý rásimine oblys ákimi Narıman Tóreǵalıev, «QazAvtoJol» UK» AQ basqarma tóraǵasy Darhan Imanashev jáne kompanııa qyzmetkerleri, merdiger uıym ókilderi men jergilikti turǵyndar qatysty.
«Memleket basshysy elimizdiń kólik-logıstıka salasyn jańǵyrtýdy aıryqsha tapsyryp, bul baǵyt ulttyq ekonomıkany kúsheıtýdiń negizgi tetikteriniń biri ekenin únemi aıtyp otyrady. Búgin iske qosylyp otyrǵan eki deńgeıli jolaıryǵy – jol qozǵalysyn qaýipsiz ári úzdiksiz qamtamasyz etýge arnalǵan zamanaýı ınjenerlik sheshim. Jańa jol toraby kólik aǵynyn rettep, qozǵalysty aıtarlyqtaı jeńildetedi. Bul – oblystyń ózge óńirlermen jáne Reseı Federasııasymen kólik baılanysyn jaqsartyp, ekonomıkalyq yqpaldastyqty tereńdetýge zor serpin beretin mańyzdy qadam», dedi óńir basshysy Narıman Tóreǵalıev.
«QazAvtoJol» ulttyq kompanııasynyń basqarma tóraǵasy Darhan Imanashev ta atqarylǵan jumystyń mańyzyn atap ótti:
«Búgin ashylǵan ýchaskeler óńirdiń kólik qoljetimdiligin túbegeıli ózgertedi. Árbir jańa shaqyrym – ekonomıkanyń, shaǵyn jáne orta bıznestiń, týrızmniń damýyna, halyqtyń ómir sapasynyń artýyna ashylǵan jańa múmkindik. Sonymen birge biz bıyl qaıta jańǵyrtý jumystary bastalǵan «Syrym» ótkizý pýnktin tolyqtaı jańartyp, ony halyqaralyq deńgeıdegi zamanaýı logıstıkalyq ortalyqqa aınaldyrýdy bastady», dedi ol.
Bul jol – «Podstepnoe-Fedorovka-Reseı Federasııasy shekarasy» baǵytynda júrgizilip jatqan iri qaıta jańǵyrtý jumysynyń mańyzdy bóligi. Jobanyń jalpy uzyndyǵy – 144 shaqyrym bolsa, búgingi tańda 72 shaqyrym jol tolyq jóndelip, kólik qozǵalysy ashyldy. Bul jumysty «QazAvtoJol» AQ júzege asyrdy.
Qalǵan 72 shaqyrymda qaıta jańǵyrtý jumysy KPO b.v. kompanııasynyń qoldaýymen júrgizilip jatyr. Joba 2026 jyly tolyq aıaqtalady.
2025 jyly Batys Qazaqstan oblysynda respýblıkalyq mańyzy bar avtomobıl joldarynyń 260 shaqyrymy jóndelip, tolyq aıaqtaldy. Onyń ishinde «Podstepnoe – Fedorovka» avtojolynyń 72 shaqyrymyn qaıta jańartý, «О́nege – Bısen – Saıqyn» baǵytynyń 103 shaqyrymyn kúrdeli jóndeý, sondaı-aq Han Ordasy aýylyna kireberis jolynyń 21 shaqyrymy men Aqtóbe – Oral avtojolynyń 64 shaqyrymdyq jolǵa ortasha jóndeý jumystary bar.
