Foto: Ashyq derekkóz
Mınıstrliktiń habarlamasynda jazylǵandaı, 2023–2029 jyldarǵa arnalǵan Qazaqstan Respýblıkasyndaǵy joǵary bilim men ǵylymdy damytý tujyrymdamasynda UBT formatyn halyqaralyq standarttalǵan formatqa kóshirý, test tapsyrmalaryn qurý jáne nátıjelerdi taldaýda psıhometrııalyq tásilderdi qoldaný arqyly jetildirý qarastyrylǵan. Osy sharalardy iske asyrý maqsatynda ETS (Educational Testing Service) jetekshi halyqaralyq uıymymen yntymaqtastyq ornatý máselesi pysyqtaldy. Aıta keteıik, ETS (Educational Testing Service) – TOEFL jáne GRE sııaqty halyqaralyq emtıhandardy ázirleıtin jetekshi halyqaralyq uıym.
Osy jyldyń 21 qyrkúıeginde Memleket basshysynyń AQSh-qa sapary barysynda ETS kompanııasynyń bas dırektory Amıt Sevakpen kezdesý ótti, onda ulttyq bilim júıesin jetildirý máseleleri talqylandy. Qorytyndysynda kelesi sharalar qabyldandy:
Birinshiden: Testileý salasyndaǵy ETS halyqaralyq jetekshi sarapshylarynyń qatysýymen jumys toby quryldy.
Ekinshiden: Osy jyldyń 31 qazanynda Astanada strategııalyq seriktestikter forýmynda ETS bas dırektory Amıt Sevaktyń qatysýymen ári yntymaqtastyqty odan ári damytý máseleleri talqylandy.
Úshinshiden: Osy jyldyń 6 qarashasynda ǴJBM, UTO jáne ETS arasynda ózara túsinistik memorandýmyna qol qoıyldy (Vashıngton, AQSh).
Tórtinshiden: Joǵary sapaly test tapsyrmalaryn ázirleýdi qamtamasyz etý maqsatynda 30 qyzmetkerdi halyqaralyq «Bolashaq» stıpendııasy sheńberinde oqytý máselesi pysyqtaldy.
Besinshiden: ETS-pen birlesip jasandy ıntellekt, adaptıvti testileý jáne halyqaralyq standarttardy qoldanatyn jańa test qurý tásilderi anyqtaldy.
«Jańa testileý qanatqaqty rejimde Qazaqstandaǵy sheteldik ýnıversıtetterdiń fılıaldaryna túsý kezinde engizý josparlanyp jatyr. Jalpy jańa testileý formaty UBT sapasyn arttyryp, ony eń úzdik álemdik tájirıbelerge sáıkes standarttalǵan kirispe emtıhan retinde tanylýyn qamtamasyz etedi. Aıta ketý kerek, 2026 jyly qazirgi UBT formaty ózgermeıdi, jańa test formatyn kezeń-kezeńimen engizý 2027 jyldan bastalady», delingen habarlamada.
