1996 jyldan beri óńirde adamnyń ımmýn tapshylyǵynyń vırýsy (AITV) ınfeksııasy 1192 márte tirkelgen eken. Bıylǵy 10 aı ishinde BQO-da 61 jańa jaǵdaı anyqtalǵan. Bul az ba, kóp pe?
«Bul ótken jyldyń sáıkes kezeńimen salystyrǵanda 8 jaǵdaıǵa kóp. Biraq biz eń aldymen anyqtaý sharalaryn kúsheıtip, osyndaı nátıjege jettik», deıdi oblystyq AITV ınfeksııasynyń aldyn alý ortalyǵynyń dırektory Aqtilek О́mirbaev.
Bıyl AITV ınfeksııasy Oral qalasynda 42 ret anyqtalypty. Sondaı-aq Bórli aýdanynda – 6 jaǵdaı, Terekti aýdanynda – 4 jaǵdaı, Báıterek jáne Aqjaıyq aýdandarynda – 2 oqıǵa, al Tasqala, Jańaqala, Qaztalov jáne Shyńǵyrlaý aýdandarynda – 1 jaǵdaı tirkelgen. Sonymen qatar basqa óńirden kelgen adamdardyń biri de osyndaı vırýsqa shaldyqqany anyqtalǵan.
Bir qýanarlyǵy, óńirde balalar men jasóspirimder arasynda vırýs juqtyrǵan jaǵdaı joq. Syrqattardyń jeteýi – 20-29 jas aralyǵynda, 26-sy – 30-39 jasta. 40-49 jastaǵylar arasynda – 16 jaǵdaı tirkelse, 50-59 jas aralyǵynda – 9 jaǵdaı, 60 jastan joǵarylar ishinde – 3 jaǵdaı anyqtalǵan. Osylaısha, syrqat adamdar 30 ben 50 jas aralyǵyndaǵy eńbekke qabiletti jandar arasynda kóp bolyp tur.
«Jynystyq quramy boıynsha anyqtalǵan jaǵdaılardyń ishinde er adamdar basym. Olardyń sany - 41, bul barlyq tirkelgen jaǵdaıdyń 67,2%-yn quraıdy. Áıelder arasynan 20 jaǵdaı anyqtaldy», deıdi ortalyq dırektorynyń orynbasary Almagúl Mantaqova.
Saraptama ınfeksııa juqtyrýshylardy áleýmettik mártebe turǵysynan da saralap kórgen. Iаǵnı syrqattardyń arasynda jumys isteıtini – 27 adam, jumyssyzy – 26 adam, 2 zeınetker, 2 sottalǵan jáne 2 tergeýde jatqan adam bolǵan. Budan bólek, 1 áskerı qyzmetshi jáne áleýmettik mártebesi anyqtalmaǵan 1 adam anyqtalypty.
Dárigerler óńirde AITV ınfeksııasy negizinen 88,6%-yna deıin jynystyq jolmen taralyp jatqanyn aıtady. Sondaı-aq jańa syrqattardyń 10 paıyzǵa jýyǵy ınfeksııany parenteraldyq jolmen juqtyrǵan. Bul eń aldymen ıneksııalyq esirtki qoldanýdan bolady.
«Árıne aldyńǵy jyldarmen salystyrǵanda bul kórsetkish sál tómendedi, biraq nashaqorlyq máselesi áli de ózekti», deıdi mamandar.
