Foto: Avtor
Bul ıdeıa qalaı paıda boldy?
Astananyń shet jaǵyndaǵy qarapaıym «Áziret» dúkenine kirgen jurt sońǵy kúnderi erekshe ásermen shyǵyp jatyr. Sebebi kásipker Temirhan Safarov 16 jeltoqsan – Táýelsizdik kúnine oraı dúkendi tolyqtaı ulttyq reńkke boıap, qabyrǵalarǵa kók týlar men myńdaǵan sharlardy ilgen.
Kásipker bul jumysty jeti kún boıy ózi uıymdastyrǵan. Onyń aıtýynsha, 4 myńnan astam shar men shamamen 1 myń týdy ornalastyrý úshin shamamen 2 mıllıon teńge jumsalǵan.
Temirhan Safarovtyń aıtýynsha, bastama eshkimniń tapsyrmasy emes, óziniń ıdeıasy.
«Bul – meniń Táýelsizdik kúnine jasaǵan jeke qurmetim. Saýdaǵa kiriskenime bar bolǵany bir jyl boldy. Alǵashqy jylymyz osylaı este qalsyn dedim. Aldaǵy ýaqytta kásibimiz úlkeıse, munan da aýqymdy dúnıe jasaımyn», deıdi ol.
Jelide bastalǵan qoldaý tolqyny
Dúkenniń sýretteri aldymen Threads jelisinde tarady.
«Jańa jyl merekesi jaqsy, biraq odan da mańyzdy mereke kele jatqanyn umytpaýymyz kerek. Bizdiń úıdiń janyndaǵy osy dúken ıesine erekshe rızamyn. Ol bárimizge mańyzdy kúndi eske saldy», dep jazdy qoldanýshylardyń biri.
Dúkenge kirgen jurt ta tańdanysyn jasyra almaı, áleýmettik jelide jyly pikirler qaldyryp jatyr.
Prodıýser jáne akter Nurlan Qoıanbaev bul bastamany der kezinde nazarǵa alyp, óz jelisinde buryn jarııalaǵan fleshmobty qaıta jańǵyrtty. Esterińizge sala ketsek, ol birneshe aı buryn Threads jelisinde: «Ár sársenbi – Qazaqstanǵa arnalǵan post kúni bolsyn!» degen bastama kótergen edi.
Qoıanbaev elordadaǵy bul dúkendi kórisimen arnaıy baryp, kásipkerge rızashylyǵyn bildirgen. Onyń úndeýinen keıin shetelde júrgen qazaq belsendileri de, túrli eldiń blogerleri de dúken ıesiniń ulttyq merekeni dáriptegenin joǵary baǵalap, qoldaý jazbalaryn qaldyrdy.
Chellendj búkil elge tarady
Búginde kásipkerdiń ıdeıasy birer kún ishinde ózge óńirlerge tarap, Almaty, Shymkent, Qaraǵandy, Aqtóbe qalalaryndaǵy dúkender, shaǵyn marketter, tipti meıramhanalar da Táýelsizdik kúnine arnalǵan bezendirýler jasaı bastady.
