Ideıa bastaýy
«AR Sana» kezdeısoq ıdeıanyń nátıjesi emes. Jobanyń negizinde naqty áleýmettik suranys pen ǵylymı izdenis qatar jatqanyn baıqaımyz. Aınur Nurádil Nıý-Iork ýnıversıtetinde balalar medıasy men erte damý máselelerin zerttegen. Elge oralǵan soń, ol 50-den astam erekshe qajettiligi bar balanyń ata-analarymen suhbattasyp, kóptegen otbasynyń logopedke júıeli barýǵa múmkindigi shekteýli ekenin nemese kómekke kesh júginetinin baıqaǵan.
«Men aýtıstik spektr buzylysy, serebraldy sal aýrýy (SSA), ózge de ereksheligi bar kóptegen balada tildiń kesheýildeýi alǵashqy belgilerdiń biri ekenin ańǵardym. Sol kezden bastap balalardyń erkin damýyna kómekteskim keldi», deıdi ol.
Jobanyń ereksheligi
«AR Sana»-nyń basty kúshi – eki baǵyttyń toǵysýynda. Bir jaǵynan, joba zamanaýı balalar medıasynyń ǵylymı zerttelgen tásilderine súıenedi, ıaǵnı balanyń nazaryn ustap turý, emosııalyq baılanys qurý, vızýaldy oılaýdy damytý, kontentti qabyldaý psıhologııasy sekildi komponentter eskerilgen. Ekinshi jaǵynan, logopedııalyq jáne til damytý tájirıbesi júıeli túrde engiziledi.
Taǵy bir aıqyn erekshelik – reprezentasııa. Qosymsha keıipkeriniń qazaq qyzy retinde jasalýy, vızýaldy álemniń Qazaqstan men Ortalyq Azııa tabıǵatyna jaqyn qurylýy, eń bastysy – kontenttiń tolyqtaı qazaq tilinde usynylýy ulttyq balalar medıasyndaǵy sapaly ónim tapshylyǵyn azaıtýǵa baǵyttalǵan naqty qadam bolyp otyr. О́ıtkeni Qadyr Myrza Áli aıtpaqshy, «Qazaq tili bala tiline aınalmaı, ana tiline aınalmaıdy»...
Qosymsha qalaı jumys isteıdi?
Qoldanbanyń jumys logıkasy balany «jattyǵýǵa májbúrleý» emes, oıynǵa erkin engizý qaǵıdasyna qurylǵan. AR kórinisi arqyly Sana esimdi vızýaldy qyz balanyń óz bólmesinde paıda bolady. Kóp bala sóılegisi kelmegendikten emes, beıtanys adamnan jáne jańa ortadan qysylǵandyqtan logopedpen ashylyp sóılespeıdi. Al AR keńistigi balanyń qaýipsizdik sezimin saqtap, sóılesýge psıhologııalyq jol ashady.
AR bóligi aıaqtalǵan soń, bala vırtýaldy bólmege enip, sózder men sóılemderdi qaıtalaý, dybystardy durys qoıýǵa arnalǵan shaǵyn tapsyrmalar oryndaıdy. Joba jetekshisiniń aıtýynsha, «AR Sana» logopedtiń ornyn almastyrmaıdy, kerisinshe onyń jumysyn tolyqtyrýdy maqsat etedi. Maman fızıkalyq jáne terapııalyq baǵyttarǵa, ıaǵnı massaj, usaq motorıkany damytý sekildi komponentterge nazar aýdarsa, bala úıde sózdik jáne artıkýlıasııalyq daǵdylardy turaqty túrde bekite alady.
Endigi meje
Komanda artıkýlıasııalyq jattyǵýlardy engizýdi bastap ketken. Aldaǵy ýaqytta 35-ten astam artıkýlıasııalyq jattyǵý qosý josparlanǵan. Bul ádister jetekshi logoped Ajar Nurkenovamen birlesip ázirlenip, keıin táýelsiz mamandardyń baǵalaýynan ótpek. Osy tásil ónimniń ádistemelik sapasyn kúsheıtýge baǵyttalǵan.
«Bizdiń jolymyz «Astana Hub»-ta bastaldy. Tehnoparktiń eki baǵdarlamasynan ótken edik, sol kezden beri olar bizdi turaqty túrde qoldap keledi. Iаǵnı saraptamalyq konsýltasııalar, pıtchıngke daıyndyq, prezentasııany nyǵaıtý – bárinde úlken demeý boldy. Sonymen qatar Nazarbaev ýnıversıtetindegi «Social Startup» baǵdarlamasy arqyly resmı túrde áleýmettik joba retinde tanylyp, nebári bir apta buryn 10 mln teńge kólemindegi grantty jeńip aldyq. Bul bizdiń mıssııamyzdyń qoǵam úshin mańyzdy ekenin taǵy da dáleldedi», deıdi Aınur Nurádil.
Komandanyń maqsaty bir ǵana qosymshamen shektelmeıdi. «Green Álem Creative Studio» aıasynda AR tehnologııasy engizilgen kitapshalar men anımasııa jasaý jospary bar. Bul – qazaqsha balalar medıasyn ǵylymı negizde, tehnologııalyq deńgeıde júıeli túrde damytýdy kózdeıtin keńirek strategııanyń bir bóligi.
