«Qazaqstan Respýblıkasy Prezıdentiniń Qurmet gramotasy Halyq qaharmany, «Qarýly kúshter ardagerleri» respýblıkalyq qoǵamdyq birlestiginiń tóraǵasy, armııa generaly Muhtar Qapashuly Altynbaevqa Qazaqstannyń Qarýly Kúshterin qalyptastyrýǵa, elimizdiń qorǵanysy men qaýipsizdigin nyǵaıtýǵa qosqan uzaq jylǵy qajyrly eńbegi jáne jastarǵa áskerı-patrıottyq tárbıe berýdegi belsendi qoǵamdyq qyzmeti úshin tapsyryldy», delingen gramotada.
Máýlen Áshimbaev óz sózinde el-jurt Muhtar Altynbaevty táýelsiz Qazaqstannyń qorǵanys júıesin qalyptastyrýǵa úlken úles qosqan kórnekti memleket qaıratkeri, armııa generaly retinde erekshe qurmetteıtinin atap ótti. Ol Muhtar Qapashulynyń basshylyǵymen elimizdiń Qarýly kúshterin jańǵyrtý, halyqaralyq áskerı yntymaqtastyqty jolǵa qoıý, kásibı armııa qalyptastyrý baǵytynda aýqymdy jumys atqarylǵanyn aıtty. Sondaı-aq qaıratkerdiń eńbek joly parlamentarızm ınstıtýtymen de tyǵyz baılanysty ekenine mán berildi.
«Muhtar Qapashulynyń el damýyna qosqan úlesi áskerı qyzmetpen shektelmeıdi. Ol Senat depýtaty bola júrip, memlekettilikti nyǵaıtýǵa, qoǵamdy damytýǵa arnalǵan zańdardyń qabyldanýyna belsendi atsalysty. Búginde Muhtar Altynbaev «Qarýly kúshter ardagerleri» uıymyn basqaryp, ómirin eldi qorǵaýǵa arnaǵan azamattarǵa qoldaý kórsetip keledi. Sonymen qatar Senatorlar keńesiniń múshesi retindegi belsendiligin de erekshe atap ótken jón», dep M.Áshimbaev mereıtoı ıesine zor densaýlyq jáne baq-bereke tiledi.
Is-shara barysynda Muhtar Altynbaevty áriptesteri, Senatorlar keńesiniń músheleri, Qazaqstan Respýblıkasynyń eńbek sińirgen qaıratkerleri, áskerı qyzmettegi dostary quttyqtap, jyly lebizderin bildirdi.
