Foto: Otbasy bank
Nurlan Aqshanovtyń aıtýynsha, «Korporatıvtik» baǵdarlamasy aıasynda taraptar 200 mln teńgeden qarjy bóledi. Bul qarajat ýnıversıtet qyzmetkerlerine jeńildetilgen qaryzdar usynýǵa baǵyttalady.
- Baǵdarlamanyń sharty boıynsha bastapqy jarna – 10 paıyz. 5 paıyzben (JTSM 5,2%–5,3%) 20 mıllıon teńgege deıin nesıe beriledi. Baǵdarlamaǵa baspanasy joq, jas, perspektıvti oqytýshylar qatysady. Esenov ýnıvertıteti baǵdarlamaǵa óte qatty qyzyǵýshylyq tanytty. Sonyń nátıjesinde búgin «Korporatıvtik» ónimdi júzege asyrý týraly kelisimge qol qoıyp otyrmyz. Baǵdarlama kelesi jyly da jalǵasady degen oıdamyn, – dedi N.Aqshanov.
Ýnıversıtet basshylyǵy baspanasy joq qyzmetkerlerdiń áleýmettik jaǵdaıyn kóterip, oqý ornyna jas mamandardy jumysqa shaqyrýdy kózdeıdi.
- Bizdiń oqytýshylar men zertteýshiler úshin Mańǵystaýda qoljetimdi turǵyn úı alýǵa múmkindik beretin mańyzdy kelisimge qol qoıdyq. Ýnıversıtet pen bank 200 mıllıon teńgeden bóledi. Jalpy somasy 400 mıllıon teńge kólemindegi qarajat áriptesterimizdiń baspanaly bolýyna jol ashady. Bul aımaqtaǵy tehnıkalyq jáne ınjenerlik mamandyqtardy damytýdy óz moınyna alǵan ýnıversıtet úshin ǵana emes, búkil óńirdiń kadrlyq áleýeti úshin mańyzdy qadam, – dedi Shahmardan Esenov atyndaǵy Kaspıı tehnologııalar jáne ınjınırıng ýnıversıtetiniń rektory Berik Ahmetov.
«Otbasy bank» «Korporatıvtik» baǵdarlamasyn birneshe jyldan beri júzege asyryp keledi. Bul – óz qyzmetkerleriniń qoljetimdi sharttarmen baspana alýyna jaǵdaı jasaǵysy keletin kompanııalarǵa arnalǵan arnaıy baǵdarlama. Bank Qazaqstan boıynsha ondaǵan kásiporynmen seriktestik ornatyp, zaýyttar men ónerkásip oryndarynyń, ártúrli kompanııalardyń qyzmetkerlerine jańa baspana alýǵa kómektesken.
- Baǵdarlama 2019 jyly osy Mańǵystaý oblysynda bastaldy. Munaı kompanııasynyń 99 jumysshysy baspanaly boldy. Odan keıin, Nazarbaev zııatkerlik mektebi de osy baǵdarlamamen qyzmetkerlerin baspanamen qamtydy. Endi mine, Esenov ýnıversıtetiniń basshylyǵy óziniń jas oqytýshylaryna qoldaý kórsetip jatyr. Jumysqa endi ǵana kirisken jastardyń baspana máselesin sheshý óte mańyzdy. Bizdiń «Otbasy bank» te qoldaý kórsetip, qarajat bólip otyr, – dedi «Otbasy bank» Mańǵystaý oblystyq fılıalynyń dırektory Medet Ábýǵalıev.
Baǵdarlamaǵa qatysýshylar tizimin ýnıversıtet qalyptastyrady. Aıta keteıik, «Otbasy bank» ákimdiktermen birlesken jobalar aıasynda 14 myńnan astam adamǵa nesıe bergen. Al, «Korporatıvtik» baǵdarlamasy jáne jalǵa berip-jınaqtaý mehanızmi arqyly 519 qyzmetker baspanaly boldy.
