Foto: Ashyq derekkóz
Ákimniń sózinshe, sońǵy kúnderi qalada qardyń qalyń túsýi, sonymen qatar birqatar iri qoǵamdyq is-sharalardyń ótýi joldardaǵy jaǵdaıdy qıyndatqan.
«Qar jaýǵan kúnderi jaǵdaı kúrdelendi, oǵan qosa 10-11 jeltoqsanda qalada sporttyq jáne basqa da sharalar ótti. Sonyń áserinen joldardaǵy júkteme artty», dedi Jeńis Qasymbek.
Ol eki jyl buryn elorda úshin sý jáne jylýmen qamtý basty másele bolǵanyn eske saldy. Ákimdiktiń málimetinshe, bul baǵyttaǵy jumystar tolyq oryndalǵan, qazir qalada atalǵan resýrstar boıynsha tapshylyq joq.
«Búginde birinshi máselemiz – kólik qozǵalysy. Jaqyn aılarda LRT-ny iske qosamyz. Qalada jańa joldar salyndy. Kelesi jyly Táýelsizdik kóshesin aıtarlyqtaı keńeıtýdi josparlap otyrmyz. Esil jáne Nura aýdandarynan kópirlerge baǵyttalǵan aǵyn qıyndyq týdyryp otyr. Eki jańa kópirdiń jobasy ázirlenýde», dedi ol.
Jeńis Qasymbek joldaǵy júktemege jańa jumys kestesiniń de áser etkenin atap ótti.
«Ákimdiktiń tańǵy saǵat 7:30-da, al memlekettik mekemelerdiń tańǵy saǵat 8:00-de jumys isteı bastaýy áser etti. Tańǵy 8-10 aralyǵynda kósheler aıtarlyqtaı bosady. Degenmen, qozǵalys endi 06:30-dan bastalady. Soǵan qaramastan, jalpy jyljý jyldamdyǵy 15 paıyzǵa artty», dedi ákim.
Qala basshysy ákimdik tarapynan keptelisti azaıtýǵa baǵyttalǵan naqty josparlar daıyndalǵanyn jetkizdi.
Eske sala keteıik, qazan aıynda jýrnalıster Astana ákimine jańa jumys kestesine qaramastan, joldardaǵy keptelistiń nege azaımaǵany týraly saýal qoıǵan edi. Sol kezde Qasymbek ózgerister kezeń-kezeńimen júzege asyp jatqanyn aıtyp, ákimdikke ýaqyt berýdi suraǵan.
Buǵan deıin qala ákimi LRT-nyń kelesi baǵyty Qosshyǵa qaraı salynatynyn aıtqan edi. Ákimniń sózinshe, búginde Qosshydan elordaǵa kún saıyn 15-20 myń kólik qatynaıdy. Bul qala kóshelerine eleýli júkteme túsirip otyr.
