Rýstam Ibraev Gran-prı saıysynyń qola júldegeri boldy

ASTANA. 21 aqpan. Germanııanyń Dıýsseldorf qalasynda ótip jatqan dzıýdodan álemdik Gran-prı saıysynda qazaq dzıýdoshysy Rýstam Ibraev qola júldeger atandy. Bul týraly egemen.kz habarlady. Jarystyń alǵashqy kúni kilemge shyqqan Rýstam 60 kılo salmaq dárejesinde baq synady. Birinshi beldesýinde ulybrıtanııalyq Eshlı Makkenzıdi vazarı ádisimen jeńdi. Kelesi tartysta japon palýany Naohısa Takatony ıpponǵa túsirip, taza jeńiske qol jetkizdi. Al shırek fınalda ońtústikkoreıalyq Kım Von Djınge ese jiberip, qarsylasynyń fınalǵa shyǵýyn tiledi. Qýanyshymyzǵa oraı, káris sportshysy sheshýshi aıqasqa joldama alyp, Ibraev jubanysh beldesýde baq synaý múmkindigine ıe boldy. Bul synda qazaq dzıýdoshysy fransııalyq Vınsent Lımareni taza jeńispen jeńse, qola medal úshin bolǵan tartysta Grýzııa senim artqan Amıran Papınashvılıdi de ıpponǵa túsirdi. Osylaısha, Rýstam jarystyń alǵashqy kúni el qorjynyna qola júlde saldy. Bul salmaqta taǵy bir japonııalyq dzıýdoshy Torı Shıshıme jeńimpaz atandy. Ol fınalda Kım Von Djınnen aılasyn asyrdy. Shıshıme alǵashqy aınalymda bizdiń Eldos Smetovty jeńip, Inchhonda ótken Azııa oıyndarynyń chempıonyn jarys jolynan shyǵarǵanyn aıta keteıik. Dál osy kúni kilemge shyqqan Aıgúl Baıkóleva (48 kılo) men Jansaı Smaǵulov (66 kılo) shırek fınalǵa jete almady. Elaman Qońyr. Derek egemen.kz. Sýret: vk.com.