Sýret: syrboyi.kz
Birde monshada kezek kútip otyrǵan bireý: «Raqa, jýyq arada ańǵa shyqtyń ba?» dep suraıdy.
«Mende kóp ýaqyt bola bermeıdi ǵoı, keshe qolym bir qalt ete qalǵanda Aqsýdyń boıyna bara qalyp edim, ózenniń beti jypyrlaǵan úırek eken. Aldynda ǵana bir patronǵa sanap otyryp otyz bytyra salyp qoıǵan edim, ysqyryp qalyp úrkittim de, kóterile bergende shúrippeni basyp qalyp, búrkip jiberdim. Buıyrǵanǵa daýa joq degen, bir bytyram da zaıa ketpeı, otyz úırekti bir oqpen túsirdim» degen eken. Otyrǵandar «oı, páli» desip endi Eketaı aǵaǵa qaraıdy.
«Keshke taman toǵan baılap tastap qaıtyp kele jatsam, ózekte qyrǵaýyldar jaıylyp júr eken. Myltyǵymdy úıge qaldyryp ketkenim endi esime túsip, nede bolsa qur qol qaıtpaıyn dep gazdy túbine deıin basyp aǵyzyp ótip toqtasam, bes qyrǵaýyldy moınynan basyp ótippin» deıdi.
Sonda Raqymbek aǵamyz: «Traktordyń jyldamdyǵy qyrǵaýyldy basyp ótýge jetpeıdi, men bul ótirigińe sene almaımyn», deıdi ǵoı.
Sóıtse, Eketaı aǵamyz: «Eı, Rahymbek, men seniń otyz úıregińe shydaǵanda sen meniń aınaldyrǵan bes qyrǵaýylymdy kóp kórip otyrsyń ba?» degen eken.
Ázilderi jarasqan qaıran aǵalarym-aı, ekeýi de baqılyq boldy, jandary jánnatta bolsyn.
Ekeýi ol jaqta da qaljyńmen qarjasyp júrgen shyǵar...
Berikbol QASYMOV,
Aqsý aýdanynyń qurmetti azamaty
Jetisý oblysy
