Oblys ortalyǵyna irgeles bolǵan soń, aýyl turǵyndarynyń jaǵdaıy kósh ilgeri dep oılaıtyn edik. Sóıtsek, mundaǵy ahýal múlde basqasha bolyp shyqty. Aýylda halyq turaqtamaıdy. Baıyrǵy turǵyndardyń basym kópshiligi Jezqazǵan men Sátbaev qalalaryna kóshken. Jastar jaǵy shahtada jumys isteıdi. Keıbireýi aýyldaǵy úıin satpaı, áli ustap otyr. Erteń aýylǵa gaz, sý keledi sonda qymbatyraq satamyz degen úmiti bar. Bul jaǵdaı eldi mekende kútimsiz, qaraýsyz úılerdiń qataryn kóbeıtken.
Biz kórgen eki podezdi ekiqabatty úıde segiz páter bar. Tórt páterdiń bireýinde ǵana adam turady. Al bos turǵan úıler kim kóringenniń mekenine aınalǵan. Páter ıeleri kooperatıvi degen joq. Ekiqabatty úılerge sý jáne elektr energııasy syrttan keledi. Sýdy qudyqtan tasyp ishedi. Bertinge deıin turǵyndar tehnıkalyq maqsatqa qoldanylatyn sýdy tutynyp kelgen. 2022 jyldan bastap aýyldy sýmen qamtý jumysyna Jezqazǵan qalalyq sýmen jabdyqtaý kásiporny qyzmet kórsete bastaǵan. Aýyldyq okrýgtegi sý qubyrynyń jalpy uzyndyǵy toǵyz shaqyrym, jańartylý jumysy bıyl aıaqtaldy.
Tabıǵı aýyzsý bolmaǵan soń ákimdik aýyl ishine sý tazalaıtyn súzgi ornatqan. Halyq jaqyn arada sapaly aýyzsý máselesi sheshilip qalady degen úmitte. Jetpis shaqyrymdaǵy Esqula jerasty sý qorynan Jezqazǵanǵa tartylatyn jańa qubyr iske qosylsa, oǵan Keńgir aýylynyń da sý qubyry jalǵanady.
Aýyldaǵy 1973 jyly salynǵan káriz júıesi de tozǵan. 2013 jyly jańa káriz júıesi tartyla bastaǵan. Biraq merdigerdiń jaýapsyzdyǵy saldarynan joba orta joldan toqtap qalǵan. 2019 jyly bul nysan qaıtadan qolǵa alynyp, biraq «jaramsyz» dep tanyldy. Kósheniń eki jaǵyna gaz qubyry, qasynan sý qubyry tartylǵan. Ortada keıbir isten shyqqan qudyqtar bar. Sondyqtan kárizdi jańartý ońaı bolmaıyn dep tur.
Bir jaqsylyǵy, bıyl Keńgir aýylyna gaz tartyldy. Gaz qubyryn salýǵa respýblıkalyq bıýdjetten 1 mlrd 250 mln teńge bólingen, 370 mln teńge bólý jyldyń aıaǵyna josparlandy. Qazirgi ýaqytta tabıǵı gazdy árbir úı tartyp alýǵa gaz sorǵysy daıyn tur. «Keńgir aýylynda jalpy uzyndyǵy 25 316 metr qubyr tóseldi. Jumysty merdiger kásiporyn «Shymkentgaz» JShS atqardy. Qazir qujattary ǵana qaldy. Endi olardy «Aımaqgaz» fılıaly ózderiniń balansyna qabyldap alýy kerek. Barlyq qaýipsizdik talaptarynyń saqtalýyna kepildik berilgen kezde ǵana turǵyndar gazdy qosa alady. Ony qosyp beretin alty fırmanyń qyzmet kórsetý quny 650 myń teńgeden bastalady», deıdi Keńgir aýylynyń ákimi Rústem Esmaǵanbetov.
Aýyl ishinde toǵyz kóshe bar. 2018 jyly barlyq kóshege asfalt tóselgen. О́kinishke qaraı, 2022 jyly sý, 2025 jyly gaz qubyry tartylýyna baılanysty biraz kósheniń tas joly búlingen.
Aýylda balabaqsha da joq. №2 Keńgir aýyldyq mektebinde shaǵyn ortalyq jumys isteıdi. Ol ortalyq balabaqshanyń kezeginde turǵan 190 balanyń bárin birdeı qamtı almaıdy. Sondyqtan aýyl ákimdigi 210 oryndyq balabaqshanyń jobalyq-smetalyq qujattama jobasyn jasaǵan. Keıin qalamen qosylý múmkindigi týǵanda otbasy, bala sany kóbeıetini eskerilip, 320 oryndyqqa aýystyrylǵan balabaqshanyń qazir jobalyq-smetalyq qujattamasy ázirlendi.
Sondaı-aq 160 oryndyq deneshynyqtyrý-saýyqtyrý keshenin salýǵa jobalyq-smetalyq qujattama daıyndaldy. Bul joba «Aýyl – el besigi» baǵdarlamasy aıasynda júzege asyrylady.
«Meıirbıke bolyp jumys istegenime 46 jyl boldy. Buryn otbasylyq dárigerlik ambýlatorııa ǵımaraty jekemenshikke berildi. Iesi satyp jibergen soń Jezqazǵan qalasynyń
emhanasyna aýystyq. Jeti jyl boldy ákimshilik óz ǵımaratynan tegin bólme berip, jumysymyzdy jalǵastyryp jatyrmyz. Bir dáriger, úsh medbıke bar. Endi jańa medısınalyq ǵımarat ashylsa, nur ústine nur bolar edi», deıdi Gúlsim Altaeva.
Keńgir aýylynda 25 kereýettik jańadan salynyp jatqan feldsherlik-dárigerlik ambýlatorııanyń qurylys jumysy ótken jyldyń jeltoqsan aıynda bastaldy. Merdiger – «Astana Premıým Stroı» JShS, tehnıkalyq qadaǵalaý – «Dostar Stroı Grýpp» JShS-ǵa tıesili. Qurylysqa memleketke qaıtarylǵan qarjydan 248,4 mln teńge bólindi. Jaqynda qoldanysqa beriletin FAP ǵımaratynda densaýlyq salasynyń qyzmetkerlerine zamanaýı emdik qural-jabdyqtar qoıylyp, qolaıly jaǵdaı jasalǵan. Endi kadr máselesin sheshýdiń joldary qarastyrylyp jatyr.
Ulytaý oblysy
