Jarkenttik Aqjan jeńimpaz atandy

«BalaTurkvizyon» halyqaralyq balalar áni baıqaýynyń Almaty oblysy boıynsha jartylaı fınalısi anyqtaldy. Álııa Nazarbaevanyń «Jandaný álemi» qorynyń jobasy «Bala Turkvizyon-Qazaqstan» halyqaralyq balalar áni baıqaýynyń sońǵy ulttyq irikteý kezeńi Almaty oblysynda óz máresine jetti. On altynshy aımaqtyq irikteý Taldyqorǵan qalasynda ótti. Almaty oblysynyń 100-den asa ónerpazy Jetisýdyń ortalyǵyna oblys namysyn respýblıkalyq baıqaýdyń fınalynda qorǵaý úshin jınaldy. Al on eki jastaǵy Nurbek Nurym Uzynaǵash aýylynan «Uzynaǵash» óner mektebinde tálim alatyn jerlesterimen birge keldi. Ol estrada-vokal synybynda jáne fortepıanoda oınaýdy kásibı túrde úırenýde. Jol kórsetetin jetekshisi – Qydyrbek Ákimjanov. Baıqaýǵa ónerpaz Sáken Maıǵazıevtiń oryndaýyndaǵy «Asyl ana» áni men «Sanata Lıýchııa» arııa­syn daıyndap kelipti. «Biz baıqaýǵa 250 shaqyrym qashyqtyqty artqa tastap keldik. Beker kelgen joqpyz. Bizdiń shákirtterimiz óner adamdarymen tanysyp, televızııalyq túsirilimderge túsip, óz ónerlerin kórsetti. Olar óte qýanyshty. Uıymdastyrýshylar alqasynyń balalarǵa jasaǵan osyndaı úlken syıyna alǵys aıtamyz», – deıdi jetekshileri. Almaty oblysy boıynsha jartylaı fınal jeńimpazy bolyp Jarkent qalasynyń turǵyny Aqjan Baızaq tanyldy. Ol 12 jasta. Kóp balaly otbasynyń kópten kútken jáne kenje balalary. Balanyń anasy Aıjan Baızaqtyń aıtýynsha, uly úsh jasynan bastap án sala bastaǵan jáne alǵash oryndaǵan ánderiniń sózderi de kúrdeli halyq ánderi bolǵan eken. «Negizinde Aqjannyń ójet minezi men qaısarlyǵynyń, shapshańdyǵynyń arqasynda armandary oryndalýda. Mýzykalyq bilimi joq bolsa da, kóptegen baıqaýlardyń jeńimpazy atanyp úlgerdi», – deıdi anasy. Ol qalalyq merekeler men konsert­terdiń turaqty qonaǵy bolyp tabylady.  Ánnen bólek, Aqjan sportpen de aınalysady, grek-rım kúresi men sýǵa sekirý degendeı. «Jattyqtyrýshysy da balanyń sporttaǵy jetistikteriniń jaqsy ekenin aıtyp, vokalǵa daıyndyqqa jibergisi kelmeıdi», – deıdi anasy. Al Aqjannyń aıtýy boıynsha, sportpen shuǵyldaný onyń sahnada symbatty kórinýine septigin tıgizedi eken. Ol Roza Rymbaeva, Álı Oqapov, Serik Ibragımovty úlgi tutady. Jaqynda ol klarnet synyby boıynsha mýzyka mektebinde oqýyn jalǵastyrady. Aqjan Baızaq endi Almatydaǵy «Juldyzdy úıge» ulttyq irikteýdiń fınalyna daıyndalýǵa keledi. Ulttyq irikteýdiń fınaly Astana qalasynda qyrkúıektiń 16-17 kúnderi ótedi. Aımaqtyq irikteýler óz máresine jetti, biraq «Bala Turkvizyon-Qazaqstan» jartylaı fınal jeńimpazdaryn alda qyzý daıyndyq jáne Túrkııanyń Ystambul qalasynda túrki tildi 20 eldiń arasynda ótetin úlken dodada el namysyn qorǵaý múmkindigi kútýde.   «Egemen-aqparat».