«Qazgıdromet» RMK fılıalynyń málimetine sáıkes, 14 jeltoqsanda Batys Qazaqstan oblysy aýmaǵynda aýa raıy jaǵdaıy qolaısyz bolyp tur. О́ńirde kóktaıǵaq, burqasyn, qatty qar, tuman baıqalady, sondaı-aq oblystyń batysy men soltústiginde keı jerde jańbyrkeı jerde qar jaýyp, boran bolyp tur. Jeldiń ekpini sekýndyna 15-20 metrge, keı jerlerde tipti 23-28 metrge jetken. Osyǵan baılanysty avtojoldarda kóktaıǵaq paıda bolyp, burqasyn saldarynan joldardyń jekelegen ýchaskeleri jabyldy. Mysaly, 13-inen 14-ine qaraǵan túnde oblystaǵy О́nege-Bısen-Saıqyn, Jympıty-Qaratóbe, Terekti-Aqsaı baǵytyndaǵy joldar jabyldy. Al búgin, 14 jeltoqsanda qolaısyz aýa raıyna baılanysty respýblıkalyq mańyzy bar Oral-Atyraý tas joly men Úlken Shaǵan-Peremetnyı tas jolynda kólik qozǵalysy toqtatyldy.
Sondaı-aq saǵat 11:30-daǵy jaǵdaı boıynsha qolaısyz aýa raıyna baılanysty oblysta birqatar respýblıkalyq mańyzy bar avtojol ýchaskelerinde, atap aıtsaq Qaztalov-Jánibek, О́nege-Saıqyn, Oral-RF shekarasy, BQO-Atyraý oblysy shekarasy jáne Chapaı-Qaztalov baǵytynda barlyq kólik túri úshin qozǵalysqa ýaqytsha shekteý engizildi.
Buǵan qosa aýa raıynyń kúrt nasharlaýyna baılanysty oblystyń birqatar aýdanynda elektr energııasy óship qalǵan. Tipti Oral qalasynyń keıbir aýdanynda da búgin tań atqaly jaryq joq. Oblys ákiminiń baspasóz qyzmeti qazirgi ýaqytta energetıka salasynyń qyzmetteri kúsheıtilgen rejimde jumys istep jatqanyn, elektr jelilerin barynsha tezirek qalpyna keltiriletinin habarlady.
Batys Qazaqstan oblysynyń ákimi Narıman Tóreǵalıev energetıka salasyna jaýapty organdardyń qatysýymen jınalys ótkizip, ahýaldy jeke baqylaýyna alǵan. Oblys ákimi óńirlik elektr jelileri uıymdaryna, tótenshe jaǵdaılar qyzmetterine jáne jergilikti atqarýshy organdarǵa elektrmen jabdyqtaýdy qalpyna keltirý jumystaryn jedeldetý jóninde naqty tapsyrmalar beripti.
Batys Qazaqstan oblysy
