Kenttegi «Jeńis» saıabaǵyna jınalǵan halyq soǵysta qaza tapqan jerlesteriniń esimderi jazylǵan eskertkish pen «Máńgilik alaýǵa» gúl shoqtaryn qoıyp, bir mınýt únsizdikpen eske aldy. Bul týraly egemen.kz habarlady. Aýdan ákimi Bahyt Jahanov barsha halyqty merekemen quttyqtap, búgingi beıbit zaman úshin ardagerlerge alǵys bildirdi. «Azamattyq ardy tý etip, eren erliktiń úlgisin kórsetken Jeńis kúniniń avtorlaryna árdaıym qamqorlyq jasaý – perzenttik paryzymyz. Uly Otan soǵysy ardagerleri men tyl eńbekkerlerine áleýmettik qoldaýlar tek Jeńis merekesinde ǵana emes, únemi júrgiziledi. Erlik pen qaısarlyqtyń úlgisi bolǵan ardagerlerge degen qurmet eshqashan azaımaıdy», – dedi aýdan ákimi. Sonymen qatar, soǵys ardageri, «Eren eńbegi úshin» medaliniń ıegeri Pirnazar Myrzataev jas urpaqqa beıbit ómir men tynyshtyq tileıtinin jetkizdi. Odan ári jergilikti ónerpazdar otty jyldarda jaýyngerlerge jiger bergen ánderdi oryndap, merekelik kóńil-kúı syılady. Aıta keteıik, Qazaly aýdanynan Uly Otan soǵysyna 10 myńnan astam adam attandy. Solardyń 6 000-nan astamy soǵys dalasynda qaza taýyp, habar-osharsyz ketken. Al qalǵan 4 000-nan astam ardagerler elge aman-esen oraldy. Qazirgi tańda aýdanda 9 Uly Otan soǵysynyń ardageri men 900-den astam tyl eńbekkeri bar. Aýdanda Elbasynyń tapsyrmasymen Uly Otan soǵysy ardagerleri men tyl eńbekkerlerine áleýmettik qoldaýlar laıyqty kórsetilýde. Sondaı-aq, Jeńistiń 70 jyldyǵy qarsańynda aýdan boıynsha birqatar ıgi jumystar atqaryldy. Sol maqsatta 100 mln.-ǵa jýyq teńge bólindi.
Elaman Qońyr. Derek, sýret: egemen.kz.
