Otyrysty ashqan Máýlen Áshimbaev áriptesterin erkindik pen egemendiktiń sımvolyna aınalǵan memlekettik mereke – Táýelsizdik kúnimen quttyqtady.
«Bizdiń basty maqsatymyz – memlekettilik pen ulttyq birlikti nyǵaıtý men azamattardy Prezıdent Qasym-Jomart Toqaevtyń bastamasymen júrgizilip jatqan reformalar tóńiregine toptastyrý. Bul kúndi el damýynyń negizgi jetistikteri men syn-qaterlerin tereń saralaıtyn mańyzdy kezeń dep qabyldaǵan jón», dep M.Áshimbaev Memleket basshysynyń Ishki saıasat máseleleri boıynsha Jarlyǵyna sáıkes bul baǵyttaǵy negizgi qaǵıdalarǵa, qundylyqtarǵa jáne basymdyqtarǵa toqtaldy.
Bekitilgen kún tártibine baılanysty senatorlar aldaǵy beısenbide «Quqyq buzýshylyq profılaktıkasy týraly» zańdy qaraıdy. Qujatta quqyq buzýshylyqtyń aldyn alý salasynda adam men azamattyń quqyn, bostandyqtary men zańdy múddelerin qorǵaýdy jáne saqtaýdy qamtamasyz etý, quqyqtyq tártipti saqtaý jáne nyǵaıtý jóninde mańyzdy normalar bar. Otyrysta «Qazaqstan Respýblıkasynyń keıbir zańnamalyq aktilerine quqyq buzýshylyq profılaktıkasy jáne Qazaqstan Respýblıkasy zańnamasynyń jekelegen salalaryn jetildirý máseleleri boıynsha ózgerister men tolyqtyrýlar engizý týraly» ilespe zań da qaralady.
Sonymen qatar Senat otyrysynyń kún tártibine «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine Memleket basshysynyń tapsyrmalaryn iske asyrý boıynsha ózgerister men tolyqtyrýlar engizý týraly» zań shyǵaryldy. Bul zańǵa sáıkes geologııalyq aqparattyń ashyq derekqory bar salanyń negizgi sıfrlyq ınfraqurylymy retinde Jer qoınaýyn paıdalanýdyń biryńǵaı platformasyn bekitý usynylady. Platforma qatty jáne keń taralǵan paıdaly qazbalardy barlaý jáne óndirý salasyndaǵy barlyq bıznes-úderisti qamtıdy.
Depýtattar sondaı-aq Memleket basshysynyń tapsyrmalaryn oryndaý aıasynda ázirlengen «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Konstıtýsııalyq Sotynyń sheshimderin oryndaý jáne zańsyz ıemdenilgen aktıvterdi memleketke qaıtarý máseleleri boıynsha ózgerister men tolyqtyrýlar engizý týraly» zańdy qaraıdy. Atalǵan zań arqyly sybaılas jemqorlyqqa qarsy is-qımyl, memlekettik qyzmet, zańsyz satyp alynǵan aktıvterdi memleketke qaıtarý, jer paıdalaný quqyqtaryn muragerlikke alý, sondaı-aq alımenttik mindettemelerdi oryndaý máselelerin retteıtin birqatar zańnamalyq aktige túzetýler engiziledi.
Sonymen qatar palata otyrysynda taǵy basqa da zańdar toptamasy qaralady. Naqty aıtqanda, «Qazaqstan Respýblıkasynyń keıbir zańnamalyq aktilerine tarıhı-mádenı mura obektilerin qorǵaý jáne bilim berý-saýyqtyrý qyzmetteri máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń keıbir zańnamalyq aktilerine arhıv isi jáne quqyqqa qaıshy kontenttiń taralýyn shekteý máseleleri boıynsha ózgerister men tolyqtyrýlar engizý týraly» jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) ózgeris pen tolyqtyrýlar engizý týraly» zańdar Senat otyrysynyń kún tártibine shyǵaryldy.
Buǵan qosa palata otyrysynda aldyńǵy aptada senatorlar joldaǵan «Aýyl – el besigi» jobasy aıasynda qarajattyń paıdalanylýyn tıimdi baqylaý jáne «Dıplommen – aýylǵa!» baǵdarlamasynyń jekelegen erejelerin qaıta qaraý týraly depýtattyq saýaldarǵa Premer-mınıstrdiń orynbasary Qanat Bozymbaev jaýap beredi. Senat tóraǵasy atap ótkendeı, máseleniń mańyzyn eskere otyryp, talqylaýǵa máslıhat depýtattary men basqa da múddeli memlekettik organdardyń ókilderi qatysady.
Bıýroda depýtattar Májilis qabyldaǵan zańdardy jumys úshin Senattyń turaqty komıtetterine bólip berip, senatorlardyń 26 jeltoqsan men 11 qańtar aralyǵynda óńirlerde ótetin kóshpeli otyrystary men kezdesýlerine qatysty máseleler talqylandy.
