Úkimet otyrysynda Premer-mınıstrdiń orynbasary, ulttyq ekonomıka mınıstri Serik Jumanǵarın el ekonomıkasynyń 11 aıdaǵy ósimi 6,4 paıyzǵa jetkenin málimdedi. Mınıstrdiń aıtýynsha, naqty sektordaǵy ósim 8,3 paıyzdy qurap, qyzmet kórsetý salasynyń 5,3 paıyzdyq ósiminen aıqyn basym tústi. Ekonomıkanyń negizgi draıverleri retinde kólik, qurylys jáne taý-ken ónerkásibi ataldy.
Saýda kólemi 11 aıda 8,8 paıyzǵa artsa, aýyl sharýashylyǵy 6,1 paıyzdyq ósim kórsetti. О́ńdeý ónerkásibindegi ósim 5,9 paıyz deńgeıinde qalyptasty.
Ekonomıkalyq ósimdi qamtamasyz etip otyrǵan basty faktordyń biri – ınvestısııa. Negizgi kapıtalǵa salynǵan ınvestısııa kólemi 13,3 paıyzǵa ulǵaıyp, 18,5 trln teńgege jetti. Onyń ishinde jeke ınvestısııalar 9,8 paıyzǵa artqan.
Mınıstr ınvestısııa ósimi bolashaqtaǵy sapaly ekonomıkalyq damýǵa negiz qalaıtyn salalarda joǵary ekenin atap ótti. Atap aıtqanda, qarjy qyzmetinde ınvestısııa 82,8 paıyzǵa, elektr energııasymen, gazben, býmen jáne ystyq sýmen jabdyqtaýda 57,9 paıyzǵa, bilim berý salasynda 31,6 paıyzǵa, aqparat jáne baılanys salasynda 24,5 paıyzǵa ósti. Sondaı-aq aýyl sharýashylyǵynda ınvestısııa kólemi 24,1 paıyzǵa, óńdeý ónerkásibinde 20,7 paıyzǵa, kólik salasynda 13,3 paıyzǵa artty. О́ńirler boıynsha eń joǵary ósim Aqmola, Pavlodar, Jambyl, Almaty jáne Aqtóbe oblystarynda tirkeldi. Al Atyraý jáne Qaraǵandy oblystarynda ınvestısııa kóleminiń tómendeýi baıqaldy.
О́nerkásip qurylymyna toqtalsaq, azyq-túlik óndirisi 8,7 paıyzǵa, sýsyndar óndirisi 9,2 paıyzǵa ósti. Hımııa ónerkásibi 8,1 paıyzdyq ósim kórsetti. Munaı óńdeý salasyndaǵy ósim 6,5 paıyzdy qurady. Metall buıymdaryn óndirý 12,8 paıyzǵa, qurylys materıaldaryn shyǵarý 7,1 paıyzǵa artty. Taý-ken ónerkásibindegi ósim 9,7 paıyz deńgeıinde qalyptasty.
Jalpy alǵanda, jarııalanǵan derekter ekonomıkanyń ártaraptaný baǵyty saqtalyp, ınvestısııalyq belsendilik pen naqty sektordyń róli kúsheıip kele jatqanyn ańǵartady.
