Sýret: syr-media.kz
Kelisimge bir taraptan О́nerkásip jáne qurylys mınıstri Ersaıyn Naǵaspaev pen Qyzylorda oblysynyń ákimi Nurlybek Nálibaev, ekinshi taraptan ıspanııalyq «Roca Group» kompanııasynyń enshiles kásiporny – «ROKA Qazaqstan» JShS bas dırektory Danıel Ernandes qol qoıdy.
Joba Memleket basshysynyń óńdeýshi ónerkásipke ınvestısııalar tartý men ımportty almastyrý jónindegi maqsattarǵa qol jetkizý úshin lokalızasııalaýdy arttyrýǵa qatysty qoıǵan mindetterine sáıkes júzege asyrylyp jatyr.
Zaýyt keramıkalyq sanıtarlyq ónimderdi, jýynatyn bólmelerge arnalǵan jıhazdar men ózge de buıymdardy óndirýge ári qurastyrýǵa mamandanady. Qurylys jumystary kelesi jyldyń birinshi toqsanynda bastalady dep josparlandy. Joba sheńberinde 300-ge jýyq jańa turaqty jumys oryndaryn ashý, sondaı-aq otandyq mamandardy oqytý men biliktiligin arttyrý kózdelgen.
Kásiporyn úderisterdi avtomattandyrýdyń joǵary deńgeıi bar ári ekologııalyq qaýipsizdiktiń álemdik standarttaryna sáıkes keletin sanıtarlyq-tehnıkalyq ónimderdi shyǵaratyn elimizdegi alǵashqy óndiris bolady. Jobalyq qýattylyǵy jylyna 500 myń buıymdy quraıdy. Shyǵarylatyn ónimdi elimizdiń ishki naryǵyna jetkizý men Ortalyq Azııa elderine eksporttaý josparlanyp otyr. Zaýytty iske qosý qosylǵan quny joǵary ónim óndirisin ulǵaıtýǵa ári elimizdiń eksporttyq áleýetin keńeıtýge múmkindik beredi.
Aıta ketý kerek, ınvestısııalar týraly kelisim jasasý jospary Premer-mınıstr Oljas Bektenov pen «Roca Group» dırektorlar keńesiniń tóraǵasy Santıago de Gomar Roktyń osy jyldyń maýsym aıyndaǵy kezdesýi barysynda talqylanǵan edi. Osylaısha, qujatqa qol qoıylýy men jumystardyń bastalýy el ekonomıkasynyń ınvestısııalyq tartymdylyǵyn arttyrý jónindegi júıeli sharalardyń nátıjesin ári ınvestorlar seniminiń joǵary deńgeıin
kórsetedi.
«Roca Group» ókilderi Qazaqstan olar úshin strategııalyq mańyzdy naryq bolyp sanalatynyn atap ótti. Elimizdegi qolaıly ınvestısııalyq ahýalǵa oń baǵa berdi.
