Bilim ordasynda arnaıy jabdyqtalǵan shahmat kabıneti ashylyp, ár qabattyń foıesine oqýshylardyń qoljetimdi túrde oınaýyna arnalǵan shahmat taqtalary ornatyldy. Shahmat – balanyń kórneki-beıneli oılaýyn damytyp, sheshim qabyldaý, taldaý men tabandylyq daǵdylaryn qalyptastyratyn ıntellektýaldy oıyn. Sondyqtan mektepte bul baǵytqa qyzyǵýshylyq artyp otyr. Qazirgi tańda 1-4 synyptan 150 oqýshy, 5-7 synyptan 45 oqýshy turaqty túrde úıirmege qatysady.
Mektep dırektory Aıgúl Abaıqyzy bul bastamanyń mańyzy erekshe ekenin aıtty.
«Shahmat – jaı ǵana oıyn emes, balanyń mı qabiletin shyńdaıtyn qural. Úıirmege qatysyp júrgen oqýshylardyń sabaqqa yntasy artyp, oılaý jyldamdyǵy, zeıini jaqsarǵanyn baıqaımyz. Ata-analardyń da qyzyǵýshylyǵy joǵary. Olar balasynyń bos ýaqytyn tıimdi ótkizip, ózine senimdi bola túsýin qoldaıdy. Biz úshin ár jetkinshektiń jan-jaqty damýy – basty maqsat», dedi mektep basshysy.
Oqýshylardyń shahmatqa súıispenshiligin arttyrý maqsatynda jaqynda mektepke halyqaralyq grossmeıster Nurlan Ybraev kelip, jas shahmatshylarǵa sheberlik sabaǵyn ótkizdi. Bul is-shara ata-analar men balalardyń ıntellektýaldy oıynǵa yntasyn arttyra tústi.
Aıta keteıik, elimizde 42 mektepte shahmat pán retinde oqytylady, al 1500-ge jýyq bilim ordasynda úıirmeler jumys isteıdi. 2027 jylǵa deıingi keshendi jospar aıasynda Túrkistan oblysyndaǵy shahmat úıirmeleriniń sany odan ári artpaq. Bir sózben aıtqanda, shahmat – balanyń bolashaǵyn ózgerte alatyn ıntellektýaldy ınvestısııa.
Sultanbek NURLAN,
Túrkistan oblysy bilim basqarmasynyń baspasóz hatshysy
