Foto: Pinterest.com
Energetıka mınıstrliginiń ókilderi OPTI Well sıfrlyq platformasyn ázirlegen RECADO kompanııasymen birge Qumkól ken ornynda bolyp, «QazMunaıGaz» ulttyq kompanııasynda iske asyrylyp jatqan Vanguard AI jobasynyń nátıjelerimen tanysty. Sapar barysynda jumys istep turǵan uńǵymalarda jasandy ıntellektke negizdelgen otandyq sıfrlyq sheshimderdiń naqty óndiriste qalaı jumys isteıtini kórsetildi.
Erekshe nazar elimizde tolyq ázirlenip, elimizde óndiriletin uńǵymalyq kontrollerge aýdy. Bul qurylǵy – otandyq ınjenerlik oı men sıfrlyq tehnologııanyń naqty jemisi. Mamandardyń aıtýynsha, joba munaı-gaz salasynda otandyq úlesti arttyryp qana qoımaı, ulttyq tehnologııalyq quzyretti qalyptastyrýǵa jol ashady.
OPTI Well platformasy uńǵymalardy naqty ýaqyt rejıminde qashyqtan baqylap, basqarýǵa múmkindik beredi. Jasandy ıntellekt tehnologııalyq parametrlerdi taldaıdy, jumys rejimin ońtaılandyrady, óndirý kólemin arttyrýǵa yqpal etedi jáne kútpegen jaǵdaılarǵa jedel áreket etýge jaǵdaı jasaıdy. Nátıjesinde nysandarǵa jıi barý qajettiligi azaıyp, óndiristik táýekel men shyǵyn qysqarady.
Jasandy ıntellekt belgilengen jumys rejıminen aýytqýdy avtomatty túrde anyqtap, jaýapty mamandarǵa dereý habar beredi. Bul tehnologııalyq irkilisterdiń aldyn alyp, munaı óndirýdegi joǵaltýlardy azaıtýǵa múmkindik beredi.
Mamandar munaı-gaz keshenin sıfrlyq transformasııalaý jáne otandyq IT ázirlemelerdi qoldaý kerektigin atap ótti. Jobany elimizdiń ózge ken oryndarynda da keńinen qoldanýǵa áleýeti joǵary ekeni jetkizildi.
