Innovasııalyq transformasııa
Bıyl elimizdiń oqý-aǵartý salasyndaǵy ınfraqurylym belsendi jańalandy. Memleket basshysy Qasym-Jomart Toqaevtyń bastamasymen júzege asyrylyp jatqan «Keleshek mektepteri» ulttyq jobasy aıasynda 460 myń orynǵa arnalǵan halyqaralyq standartqa negizdelgen 217 jańa mektep salynyp jatyr. Bul ınnovasııalyq bilim oryndarynyń burynǵy tıptik mektepterden kólemi 15–20%-ǵa úlken, tehnıkalyq jabdyqtalý deńgeıi tórt ese joǵary. Barlyq «Keleshek mektebi» fızıka, hımııa, bıologııa, eńbekke baýlý, mýzyka, horeografııa zaly, STEM-zerthanalary men robottehnıka kabınetteri, kovorkıng jáne sport zaldarymen jabdyqtalǵan.
Infraqurylymdy jańǵyrtý jańa qurylyspen birge eski mektepterdi jóndeýmen jalǵasty. El Prezıdentiniń tapsyrmasymen úsh jylda 1300 mektepti biryńǵaı zamanaýı formatqa kóshirýdi maqsat etetin renovasııa baǵdarlamasy qarqyndy júrdi. Mektepterdi renovasııalaý eski ǵımarattardy jańartýmen birge balalar úshin zamanaýı bilimniń ortaq keńistigin qalyptastyrýdy maqsat etedi. Baǵdarlama aıasynda eski mektepterdegi kitaphanalar, ashanalar, sport zaldary qaıta jóndelip, qaýipsizdik júıeleri retteldi. Osy jyly renovasııa baǵdarlamasymen 190 myń oryndyq 245 mektep jańartyldy.
Jemqorlardan tárkilengen qarajat ta oqýshylardyń qajetine jumsalyp jatyr. Memleket basshysynyń tapsyrmasymen qurylǵan Bilim ınfraqurylymyn qoldaý qory qarajaty esebinen 86 myń orynǵa laıyqtalǵan 77 mekteptiń qurylysy aıaqtaldy. Bul mektepterdiń basym bóligi demografııasy joǵary, oqýshylar sany kóp Almaty, Túrkistan, Qyzylorda, Jambyl oblystary men Astana qalasynda ornalasqan.
Memleket basshysy orta bilim salasynyń aldyna qoıyp otyrǵan basty mindettiń biri – qala men aýyl mektepteriniń arasyndaǵy alshaqtyqty joıý. Osy maqsatta jyl saıyn 1000 mektepke jóndeý júrgizilip, pándik kabınetter jabdyqtalady. Mekteptegi qaýipsizdik jaǵdaılary da qatań baqylaýda. Keıingi 3 jylda 4000-nan astam aýyl mektebiniń materıaldyq-tehnıkalyq bazasy jańartylyp, 2000-nan astam jaratylystaný-matematıka baǵytyndaǵy zamanaýı zerthana jabdyqtaldy. Bıyl 1000-nan astam aýyl mektebi kúrdeli jóndeýden ótip, 1176 zamanaýı pándik kabınet iske qosyldy.
Erekshe atap ótetin jaǵdaı – 217 «Keleshek mektebiniń» 84-i, qaıta jóndeýden ótetin 1300 mekteptiń 820-sy aýylda ornalasqan. Bul – qala men aýyl balalary arasyndaǵy bilim teńsizdigin joıýdaǵy alǵashqy qadam. Bunymen qosa Oqý-aǵartý mınıstrligi tarapynan shaǵyn jınaqty mektepter men aýyl mektepterindegi bilim sapasyn, bilim mazmunyn, kadrlyq qamtamasyz etý, qaýipsizdik máselelerine baılanysty strategııalyq qadamdary jasaldy. Sonyń nátıjesinde bıyl aýyl oqýshylarynyń respýblıkalyq olımpıadaǵa qatysý deńgeıi 4,8%-ǵa jetti.
2020 jyldan beri elimizde 1,1 mln oqýshyǵa arnap 1242 jańa mektep salynǵan. Sodan beri ınfraqurylymdy jańǵyrtýǵa baǵyttalǵan is-sharalar úsh aýysymdy mektepter sanyn 4 esege, apatty mektepterdi 2,5 esege, oryn tapshylyǵyn 4 esege qysqartýǵa múmkindik berdi. Eski mektepterdi jańǵyrtý jáne jańa mektepterdi salý – memleket tarapynan demografııalyq ósimge negizdelgen oqýshy orny tapshylyǵy máselesin sheshýdegi júıeli jumystyń nátıjesi.
Jeńimpazdardy yntalandyrý
Bıyl orta bilim salasy úshin tarıhı jyl boldy. Onyń jarqyn dáleli – halyqaralyq olımpıadalardaǵy oqýshylarymyzdyń salmaqty jeńisteri. Jyl basynan beri 1657 oqýshy 36 halyqaralyq olımpıada men baıqaýǵa qatysyp, 922 medal jeńip aldy. Jyl basynan beri zııatker jastardyń qorjynynda 177 altyn, 329 kúmis, 416 qola medal bar. Sonymen qatar otandyq oqýshylar geografııa páninen ekinshi oryn aldy, hımııadan úsh márte chempıon atandy, ǵylymı fızıkadan absolıýtti chempıon boldy, Balqan matematıkalyq olımpıadasynda ekinshi jyl qatarynan úzdik úshtikten kórindi. Olımpıadaǵa qatysqan árbir ekinshi oqýshymyz bilim nátıjesin kórsetti. Qazaqstan tórt jyl qatarynan halyqaralyq STEM – bilim baǵytynda kóshbasshy. Buǵan dálel – «Almaty-Medeý» zııatkerlik mektebi komandasynyń tórt dúrkin álem chempıony atanýy. «First Global Challenge» álemdik robottehnıka chempıonatynda bizdiń komanda 190 elden kelgen qarsylastaryn jeńip, tórt jyl qatarynan bas júldeni ıemdenip keledi.
Osy jyly Memleket basshysy Qasym-Jomart Toqaev halyqaralyq pán olımpıadalary jeńimpazdary men júldegerlerin Aqordada marapattady. Búginde Qazaqstan – olımpıada jeńimpazdaryn yntalandyrý tájirıbesi bar sanaýly elderdiń qatarynda. El Prezıdentiniń bastamasymen 2022 jyldan beri elimizde halyqaralyq olımpıada júldegerlerine qarjylaı syıaqy taǵaıyndalyp keledi. Bıyl olımpıada júldegerleri men olardyń tálimgerlerine jalpy somasy 100 mıllıon teńgeden astam birjolǵy syıaqy berildi. Endi keler jyldan bastap Prezıdent tapsyrmasymen halyqaralyq bedeldi pándik olımpıadalarmen qatar halyqaralyq ǵylymı baıqaýlarda altyn, kúmis jáne qola medal alǵan oqýshylarǵa da memlekettik syıaqy beriledi. Bul sheshim de jastardy ǵylymǵa erekshe yntalandyrady dep senemiz.
Ustazǵa qurmet
Bıyl halyqaralyq «TALIS 2024» zertteýiniń nátıjeleri elimizde pedagogterdiń eńbek jaǵdaıy jaqsaryp, bilim salasyndaǵy memlekettik saıasattyń tıimdiligin kórsetti. Bul – Memleket basshysy Qasym-Jomart Toqaevtyń pedagogterdiń eńbegin baǵalaýǵa, qurmetteýge baǵyttalǵan zańnamalary men reformalarynyń nátıjesi. Zertteýde Qazaqstan «pedagog eńbegi baǵalanady» dep esepteıtin elderdiń qatarynda ekinshi orynda. Elimiz muǵalimderdiń jalaqyǵa qanaǵattaný deńgeıi joǵary bes eldiń qatarynda. Bul tizimde Qazaqstanmen birge Bolgarııa, Kolýmbııa, Rýmynııa, Qytaı bar. 2018 jyly jalaqyǵa kóńili tolatyn muǵalimderdiń úlesi nebári 39% bolsa, byltyr bul kórsetkish 71%-ǵa jetti.
Aptalyq júktemeniń 50 saǵattan 36 saǵatqa deıin qysqarǵany ustazdar eńbeginiń nátıjeliligine oń áser etti. Búginde muǵalimderdiń ákimshilik júktemesi azaıdy, olar bala oqytýǵa jáne ata-analarmen jumysqa kóbirek ýaqyt bóle bastady. Nátıjesinde, muǵalimderdiń mamandyǵymen jáne eńbek jaǵdaıymen qanaǵattaný deńgeıi de aıtarlyqtaı ósip, muǵalimderdiń 95%-y jumysyna kóńili tolatynyn habarlaǵan.
Pedagog mamandyǵynyń qoǵamdaǵy bedeli de nyǵaıdy. Otandyq pedagogterdiń 82%-y ózderiniń eńbegi qoǵamda baǵalanady dep sanaıdy, al 73%-y óz eńbekterin buqaralyq aqparat quraldary, 58%-y saıasatkerler baǵalaıdy dep esepteıdi. Sonymen qatar elimizde magıstr dárejesi bar pedagogterdiń úlesi úsh ese ósip, 11%-ǵa jetti. Halyqaralyq zertteý mekteptegi klımattyń jaqsarǵanyn da erekshe atap ótken.
Memleket basshysy Qasym-Jomart Toqaevtyń ustazdarǵa qamqorlyǵy erekshe. Prezıdent bilim salasyndaǵy ǵylymnyń rólin aıqyndaı otyryp, pedagogterdiń kásibı mártebesi men sapalyq quramyn júıeli qalyptastyrýdyń strategııalyq mańyzyn únemi alǵa tartady. Qazir muǵalimderdiń biliktilik sanaty, attestattaý, bilim sapasy erejelerine taldaý júrgizý, zerdeleý jumystary jalǵasyp jatyr. Bilim mazmunyn eńbek naryǵyna sáıkestendirý úshin muǵalimniń bilim sapasyn jaqsartý baǵytynda keshendi saraptama jumysy bastaldy.
Búginde respýblıkada 23 myńǵa jýyq bilim uıymynda shamamen 600 myń pedagog jumys isteıdi, 5 mıllıon 900 myńnan astam bala bilim alyp jatyr. «Pedagog mártebesi týraly» zań qabyldanǵannan beri mektep muǵalimderiniń jalaqsy eki ese ósti. Mektepke deıingi uıymdardyń pedagogteriniń jalaqysy 30% artty. Kolledjderdegi óndiristik bilim beretin sheberlerdiń jalaqysy 35% ósti. Sonymen qatar qosymsha aqy, birjolǵy tólemder engizildi. Muǵalimderdiń eńbek demalystary 45 kúnnen 56 kúnge uzartyldy. Prezıdenttiń qoldaýymen 5 ustaz «Qazaqstannyń Eńbek Eri», 95 ustaz «Qazaqstannyń eńbek sińirgen ustazy» ataǵyna ıe boldy.
Elimizdegi pedagogterdiń sapalyq quramy 45,8%-dy quraıdy. Búgingi kúnge pedagogterge jalpy qajettilik 5 myń 413-ti quraıdy, onyń ishinde 2506 nemese 54% muǵalim aýyl mektepterine jetpeıdi. Búginde bilim salasynda matematıka (1069) bastaýysh synyptary (751), orys tili jáne ádebıeti (635) fızıka (382), hımııa (340) pánderiniń muǵalimderine degen qajettilik bar. Oqý-aǵartý mınıstrliginiń aldynda turǵan reformalarda endi osy máselege ekpin salynatyn bolady.
Jasandy ıntellekt jobalary
Bıyl orta bilim standarttaryna jasandy ıntellekt elementterin engizý, quzyrettilikke negizdelgen tásilderdi paıdalaný jáne STEM baǵyttaryn ıntegrasııalaý jumystary bastaldy. Sonyń aıasynda jańa oqý jylynan bastap oqý úderisine jasandy ıntellekt elementteri kezeń-kezeńimen engizile bastady. 1–4 synyptardaǵy «Sıfrlyq saýattylyq» páni «Sıfrlyq saýattylyq jáne jasandy ıntellekt», 5–11 synyptardaǵy «Informatıka» páni «Informatıka jáne jasandy ıntellekt» pánderine transformasııalanyp jatyr. Osy pánderdiń oqý baǵdarlamalary qazirgi tańda saraptamadan ótip jatyr. Orta bilim júıesinde jasandy zerdeni qoldanýdyń etıkalyq standarty da bekitildi.
Mınıstrlik janynan IT salasyndaǵy sarapshylardyń basyn qosatyn Bilim salasyna jasandy ıntellektini engizý jónindegi jumys toby quryldy. Top quramyna mınıstrlikke qarasty uıymdar, kolledjder men mektepterdiń sarapshylary IT-kompanııalar men startap jobalardyń jetekshileri, táýelsiz sarapshylar kirdi. Qazirgi ýaqytta jumys tobynyń qyzmetin uıymdastyrýǵa arnalǵan jol kartasy ázirlendi. Endi jumys tobynyń músheleri salalyq zańnamaǵa usynystar daıyndap, qanatqaqty jobalardyń tıimdiligin taldaıdy.
Búginde Astana qalasyndaǵy №107 mektepte jasandy ıntellekt negizindegi mektep modelin engizý boıynsha qanatqaqty joba júzege asyp jatyr. Mektep ázirge «Alaqan», «Protector AI», «AI Mektep», «AI Kitap», «Roqed» sııaqty júıelermen jumys isteıdi. Matematıka men qazaq tili pánderiniń 5 synyptaǵy mazmuny jasandy ıntellektige sáıkes zerdelenip jatyr. Jasandy ıntellekt muǵalimderge ádistemelik qural daıyndaýǵa kómektesedi. Qazir osy baǵytta usynystar jasalyp jatyr.
Aldaǵy ýaqytta joǵary sapaly sıfrlyq oqý materıaldaryn, onlaın kýrstardy jáne bilim platformalaryn jasaý isi qarqyn alady. Ustazdarǵa qajetti daǵdylardy berý isi de kesheýildemeýi qajet. Osy maqsatta «Jasandy ıntellekt kómegimen oqytý: generatıvti modelder jáne promt-ınjınırıng óneri» atty onlaın-kýrs daıyndaldy. Bul kýrs – «О́rleý» biliktilikti arttyrý ulttyq ortalyǵy» aksıonerlik qoǵamy men IýNESKO-nyń birlesken ónimi.
Mekteptegi oqý úderisine jasandy ıntellektini kiriktirý munymen shektelmeıdi. Sıfrlyq resýrstarǵa qoljetimdilikti qamtamasyz etý baǵytynda Oqý-aǵartý mınıstrligi jergilikti atqarýshy organdarmen birlese otyryp bilim salasyna qajetti startap jobalardy saralaıtyn bolady. Usynylatyn startap jobalar qaýipsizdik jáne bilim uıymdarynyń ákimshilik-basqarýshylyq úderisin ońtaılandyrý sheshimderine sáıkes irikteledi.
Sonymen qatar Memleket basshysy Qasym-Jomart Toqaevtyń bastamasymen qolǵa alynǵan «Qazaq Digital Mektebi» jobasy aıasynda da birqatar is-shara kesheni iske asyrylady. Pılottyq óńirler retinde Soltústik Qazaqstan, Qostanaı, Aqmola, Pavlodar, Batys Qazaqstan, Aqtóbe, Shyǵys Qazaqstan oblystary anyqtaldy. Joba aıasynda mektepter úshin jaratylystaný-matematıkalyq jáne qoǵamdyq-gýmanıtarlyq baǵyttardaǵy negizgi pánderdi sapaly oqytý úshin sıfrlyq platforma daıyndalatyn bolady. Oqý úderisi jasandy ıntellekt tárbıeshilermen birge júredi. Ol úshin shaǵyn jınaqtalǵan mektepter tıisti jabdyqtarmen jáne ınternet jelisimen qamtylady. Jobany iske asyrýdy 2026–2027 oqý jylynan bastaý josparlanyp otyr.
Bala qaýipsizdigi
Bıyl Memleket basshysy Qasym-Jomart Toqaevtyń bastamasymen balalardyń qaýipsizdigin qamtamasyz etýge baǵyttalǵan júıeli ári naqty is-sharalar qabyldanyp, bala quqyn qorǵaýdy kúsheıtetin 6 negizgi zań kúshine endi. Bul zańdar balalardyń ómirine, densaýlyǵyna, psıhologııalyq saýlyǵyna tónetin qaýip-qaterlerdiń aldyn alý tetikterin zańnamalyq deńgeıde bekitti.
Sonyń ishinde kámeletke tolmaǵandarǵa qatysty aýyr jáne asa aýyr sıpattaǵy qylmystar úshin jaýapkershilik kúsheıtildi. Endi mundaı qylmystyq isterdi tatýlasý arqyly toqtatýǵa zańmen tyıym salyndy. Sonymen qatar balalarǵa qatysty jasalǵan eń aýyr qylmystar úshin ómir boıyna bas bostandyǵynan aıyrý jazasy engizildi.
Elimizde alǵash ret býllıng pen kıberbýllıng úshin ákimshilik jaýapkershilik belgilendi. Sondaı-aq pedagogter men áleýmettik sala qyzmetkerleri kámeletke tolmaǵandarǵa qatysty zańsyz áreketterdi ýaqtyly quqyq qorǵaý organdaryna habarlamasa, ózderi de ákimshilik jaýapkershilikke tartylady. Osy jyldyń basynan bastap osy bap boıynsha 404 is tirkelip, 238 jaǵdaıda aıyppul salyndy. Bul – zańnamanyń naqty iske asyrylyp jatqanyn jáne qoǵam tarapynan balalar qaýipsizdigine degen jaýapkershilik artqanyn kórsetedi.
Bıylǵy alǵashqy 11 aıda «111» biryńǵaı baılanys ortalyǵyna 119 myńnan astam ótinish kelip tústi. 20 óńirde Psıhologııalyq qoldaý ortalyǵy qurylyp, olar jyl basynan beri 35 myńnan astam bala men ata-anaǵa kómek kórsetti. Bas prokýratýranyń Quqyqtyq statıstıka jáne arnaıy esepke alý jónindegi komıtetiniń deregine súıensek, osy jyldyń 11 aıynda balalarǵa qatysty jasalǵan qylmystyq quqyq buzýshylyqtar sany byltyrǵy osy kezeńmen salystyrǵanda 2,3%-ǵa, al kámeletke tolmaǵandarǵa (jynystyq) qatysty quqyqbuzýshylyqtar 17,9%-ǵa tómendedi.
Bilim salasynda balalardy qorǵaý baǵytynda 1 qyrkúıekten bastap barlyq mektep pen kolledjde «DosbolLIKE» otandyq antıbýllıngtik baǵdarlamasy engizildi. Baǵdarlama balalar arasyndaǵy býllıng oqıǵalaryn azaıtýǵa, bilim uıymdarynda ózara syılastyq, qoldaý jáne qaýipsiz orta qalyptastyrýǵa baǵyttalǵan. Bala quqyn qorǵaý maqsatynda qamqorshylyq organdaryndaǵy qyzmetkerler sany 3,3 esege ósti. Balalardyń quqyn qorǵaýǵa arnalǵan jańa basqarmalar qurylyp jatyr.
Áleýmettik qoldaý men sapa monıtorıngi
О́ńirlerde balalardyń ómir súrý sapasyn arttyrý jáne qaýipsizdigin qamtamasyz etý úshin bıylǵy 1 qyrkúıekten bastap balalardy tamaqtandyrýdyń jańa standarty qabyldandy. Bul standart halyqaralyq talaptarǵa saı jáne balalarǵa qaýipsiz, sapaly jáne teńgerimdi tamaqtanýdy qamtamasyz etýge baǵyttalǵan. Osy oqý jylynda 1,7 mıllıonnan astam oqýshy tegin tamaqpen qamtyldy. «Jalpyǵa birdeı bilim» qory arqyly osal sanattaǵy 500 myńǵa jýyq oqýshyǵa 25,3 mlrd teńge kóleminde kómek kórsetildi. Bul qarajat esebinen balalarǵa oqý quraldary, mektep formasyn alyndy.
Barshaǵa belgili elimizde orta bilim tegin. Osy negizde jan basyna shaqqandaǵy qarjy mehanızmi engizildi. Tipti 900-ge jýyq jekemenshik mektepter úshin de memlekettik tapsyrys júzege asyrylady. Bastaýysh synyptarda oqýshylarǵa bir mezgil tegin ystyq tamaq beriledi. 1–11 synyptarda balalar tegin oqýlyqtarmen qamtamasyz etilgen. Mektepterde qosymsha sabaqtar men úıirmeler de tegin. Bilim ordasyndaǵy osy úıirmeler men seksııalarǵa bıyl 2,2 mıllıon oqýshy qatysty. Keıingi eki jyl ishinde bul kórsetkish shamamen 38%-ǵa ósti. Jyl saıyn ata-analardyń tegin bilim qyzmetine degen senimi artyp keledi.
Elimizde muǵalimderdiń biliktiligin arttyrý da aqysyz negizde júzege asyrylady. 5–11 synyptarda oqıtyn 285 myń turmysy tómen shańyraqtardyń balasy bir rettik ystyq tamaqpen qamtyldy. Qala mektepterinde mektep oqýshylary úshin qoǵamdyq kólikterde qatynaý tegin. Shaǵyn jınaqty mektepterde balanyń mektepke qatynaýy tegin. Bıyl múmkindigi shekteýli balalarǵa da laıyqty kómek kórsetildi. 1–4 synyptardaǵy 51 myń oqýshyǵa, 5–11 synyptardaǵy 44 myń oqýshyǵa oqý quraldary, ońaltýǵa arnalǵan tehnıkalyq quraldar berildi. Munyń barlyǵy – bilim salasyndaǵy nátıjeli áleýmettik saıasattyń kórinisi.
Al 2026 jyldan bastap elimizde balalardy qoldaý men damytýǵa baǵyttalǵan barlyq is-sharany biriktiretin «Qazaqstan balalary» atty biryńǵaı ulttyq baǵdarlama iske qosylady. Bul baǵdarlama balanyń ómir jolynyń barlyq kezeńin qamtıtyn keshendi ulttyq strategııaǵa aınalmaq. Bilim alýshylardyń bilim jetistikterin monıtorıngten ótkizý – bilim sapasyn baǵalaýdyń ulttyq júıesiniń mańyzdy quramdas bóligi. Bıyl da osy is jalǵasyn tapty. Osy jyly 4 jáne 9-synyp oqýshylarynyń fýnksıonaldyq saýattylyǵyn, ıaǵnı bilim men daǵdylardy naqty ómirlik jaǵdaılarda qoldanýyn, sondaı-aq analıtıkalyq jáne logıkalyq oılaýdy damytýdy baǵalaý úshin monıtorıng júrgizildi. Jalpy, mektepterde testileý jyl saıyn oqý jylynyń ekinshi toqsanynda saýattylyqtyń úsh baǵyty boıynsha (oqý, matematıkalyq jáne jaratylystaný saýattylyǵy) elektrondy formatta ótkiziledi. Monıtorıng kezinde bilim uıymdarynyń 25%-y qamtyldy. Monıtorıng nátıjelerine sáıkes mektepter ádistemelik kómek alady jáne bilim sapasyn jaqsartý boıynsha usynystar ázirlenedi.
Sonymen qatar Oqý-aǵartý mınıstrligi 2023–2024 jyldary mektep oqýshylaryna arnalǵan ulttyq baǵalaý quralyn jetildirý maqsatynda Halyqaralyq saraptama jáne sertıfıkattaý ǵylymı zertteý ortalyǵynan (Research Centre for Examination and Certification RCEC, Nıderland) halyqaralyq akkredıtasııadan ótti. Bul uıymmen ekijyldyq yntymaqtastyq barysynda ulttyq baǵalaý quralyn akkredıtteýdiń jeti kezeńi júzege asyryldy, olar baǵalaý júıesin ázirleýdi, test suraqtarynyń bazasyn qurýdy, nusqaýlyq ázirleýdi, sıfrlyq platformada testileýdi ákimshilendirýdi, halyqaralyq standarttarǵa sáıkes nátıjelerdi taldaýdy qamtydy.
Tobyqtaı túıin
Bıyl elimizdiń oqý-aǵartý salasy úshin tabysty jyl boldy. Bul jyl sandyq kórsetkishterimen qatar, sapalyq ózgeristerimen de erekshelendi. Memleket basshysynyń tapsyrmasymen elimizde apatty ári 3 aýysymdy mektep sany edáýir azaıyp jańa mektepter ashyldy, sıfrlyq ınfraqurylymdy jańǵyrtý isi bastaldy. Muǵalimder men oqýshylardy qoldaýǵa baǵyttalǵan memlekettik saıasattyń tıimdiligi halyqaralyq zertteýler men olımpıada nátıjeleri arqyly dáleldendi. Biz úshin qazirgi basty mindet – bilim mazmuny men mekteptegi tárbıeniń salmaǵy men tereńdigin arttyrý. Ustazdardyń kóńil kúıi men qoǵamǵa rızashylyǵy olardyń eńbeginiń nátıjesine tikeleı áser etetini sózsiz. Sondyqtan halyqaralyq jarystarda oqýshylar qol jetkizgen jetistikter bilikti de izdenimpaz ustazdar men eńbekqor oqýshylarymyzdyń jetistikteriniń bir parasy ǵana. Biz keler jyly da bilim júıesin odan ári jetildirýge kúsh salamyz. Osylaısha, barlyq oqýshy men ustazǵa teń múmkindik usynatyn, bilim mazmuny eńbek naryǵyna sáıkestendirilgen bilim ekojúıesin qurýǵa umtylamyz.
Juldyz SÚLEIMENOVA,
Oqý-aǵartý mınıstri
