Foto: nazarbayevfund.kz
Nazarbayev University doktorantýrany qoldaý baǵdarlamalaryn keńeıtedi. Ýnıversıtettiń 15 jyldyǵyna oraı PhD baǵdarlamalaryna 200 tolyq grant bólinedi. Bul aldyńǵy jyldarmen salystyrǵanda shamamen eki ese kóp. Qosymsha qarjylandyrýdy ýnıversıtettiń ózi jáne NU Impact Foundation áleýmettik damý qory qamtamasyz etedi.
Ýnıversıtet prezıdenti, professor Vakar Ahmadtyń aıtýynsha, NU doktorantýra túlekterin sapaly daıarlaýymen halyqaralyq deńgeıde bedel jınaǵan.
«Bizde álemdik deńgeıdegi professorlyq-oqytýshylar quramy men zamanaýı zertteý ınfraqurylymy bar. Osy múmkindikter talantty ári talapty jastardyń akademııalyq áleýetin tolyq ashýyna jol ashady. PhD granttarynyń eki ese artýy – elimiz ben óńir úshin ózekti ǵylymı máselelerdi sheshýge baǵyttalǵan zertteýlerdi damytýǵa degen berik ustanymymyzdyń kórinisi», dedi ol.
Qosymsha granttar doktorantýranyń barlyq baǵyttaryna bólinedi. Ásirese fızıka, kompıýterlik ǵylymdar, ınjenerııa jáne medısına salalaryna basymdyq beriledi.
Doktor Lýıs R. Rohas-Solorsano ýnıversıtettiń aldaǵy maqsatyn da atap ótti.
«Biz NU qabyrǵasynda 1000-nan astam doktorant pen kásibı doktorlyq baǵdarlamalar tyńdaýshylary bilim alǵanyn qalaımyz. Sol úshin aldaǵy jyldary doktorantýraǵa qabyldaýdy ulǵaıtyp, jańa akademııalyq qurylym – Doktorantýra ınstıtýtyn qurýdy josparlap otyrmyz», dedi ol.
Aıta keteıik, Nazarbayev University jas ýnıversıtetterdiń jahandyq reıtınginde 106-orynda tur. Sonymen qatar Times Higher Education bedeldi halyqaralyq reıtıngi boıynsha Ortalyq Azııa men Kavkaz aımaǵyndaǵy №1 ǵylymı-zertteý ýnıversıteti atanyp, álemdegi úzdik joǵary oqý oryndarynyń top 23 paıyzyna engen.
