Atyraý áýejaıyna Hıýaz Dospanovanyń esimin berý usynyldy

ATYRAÝ. 11 mamyr. Atyraýdaǵy halyqaralyq áýejaıǵa ekinshi dúnıejúzilik soǵysqa qatysqan qazaqtyń ushqysh qyzy, Halyq Qaharmany Hıýaz Dospanovanyń esimin berý usynyldy. Bul týraly egemen.kz tilshisi habarlady. Atalǵan habar «Atma-Atyraý áýejaıy jáne tasymaly» aksıonerlik qoǵamynyń Jeńistiń 70 jyldyǵyna arnalǵan saltanatty sharasynda málim etildi. Aksıonerlik qoǵam basshysynyń orynbasary Jańyl Úmbetııarovanyń aıtýynsha, Atyraý oblystyq ákimdigine Hıýaz Dospanovanyń esimin áýejaıǵa berý jónindegi bastamashyl toptyń jáne Parlament depýtattarynyń usynystary jetkizilgen. Aıtqandaı, áýejaı ujymy atalǵan usynysqa qoldaý bildirip otyr. Eske sala keteıik, Atyraýda buǵan deıin  Halyq Qaharmany, ushqysh Hıýaz Dospanovanyń músini ornatyldy. Keıinnen onyń esimimen «Eır Astana» áýe kompanııasynyń «Embraer 190» laıneri ataldy. Joldasbek Shópeǵul. Derek: egemen.kz. Sýret: Rahym Qoılybaev.