Marapattaý rásiminde Qorǵanys mınıstri armııany damytýdyń negizgi basymdyqtaryna toqtaldy. Onyń aıtýynsha, qazirgi kezeńde áskerdiń utqyrlyǵy, tehnologııalyq jańashyldyqqa beıimdiligi jáne jeke quramnyń qajettilikterine baǵyttalǵan saıasat sheshýshi mánge ıe.
Mınıstr qorǵanys salasyna aqparattyq tehnologııalardy keńinen engizý áskerı basqarý júıelerin jetildirýge, quqyqtyq tártipti nyǵaıtýǵa, medısınalyq monıtorıngti damytýǵa jáne azamattarǵa kórsetiletin servıstik qyzmetterdiń sapasyn arttyrýǵa múmkindik beretinin atap ótti.
«Búgin biz kásibıliktiń sózben emes, naqty ispen ólshenetinin kúndelikti qyzmetimen dáleldep júrgen azamattarǵa qurmet kórsetip otyrmyz. «Ásker tarlany» – komandırler seniminiń, qarýlas serikter syılastyǵynyń jáne otbasylar maqtanyshynyń aıqyn kórinisi. Sizderdiń bilimińiz, sabyryńyz, tártipke beriktigińiz ben joldastyq rýhyńyz – armııanyń basty qundylyǵy», dedi Dáýren Qosanov.
Úzdikter esimi ataldy
Kásibı saıys qorytyndysy boıynsha úzdik ushqysh atalymyn maıor Ashat Tezekbaev (53975 áskerı bólimi) ıelendi. Úzdik teńizshi atandy – «Mańǵystaý» zymyran-artıllerııalyq kemesiniń komandıri, 3-dárejeli kapıtan Ermekbaı Ospanov (29011 áskerı bólimi).
Arnaıy operasııalar kúshteriniń 20030 áskerı bóliminde qyzmet etetin aǵa leıtenant Baqytjan Jaılaýbaev «Jaýjúrek» nomınasııasymen marapattaldy. Al áýe shabýylyna qarsy qorǵanys áskerleriniń 97638 áskerı bóliminiń serjanty Andreı Fýks «Áýe qorǵaýshysy» atalymyna ıe boldy.
Jaýyngerlik daıyndyqtaǵy úzdik serjant dep 18404 áskerı bóliminiń 3-synypty serjanty Jandos Raqymǵazy tanyldy. Úzdik sportshy atalymy 35950 áskerı bóliminiń kapıtany Joldas Saparǵa berildi.
Qurlyq áskerleri qatarynan birqatar maman kásibı sheberligimen erekshelendi. Aǵa serjant Danııar Bekjan (12740 áskerı bólimi) – úzdik artıllerıst, kishi serjant Ashat Tynyshtyq (25744 áskerı bólimi) – jaýyngerlik mashınanyń úzdik komandıri atandy. Mergender arasynda efreıtor Elnur Kózjan (99116 áskerı bólimi) úzdik dep tanylsa, serjant Qýandyq Ahmetqalıev (10810 áskerı bólimi) úzdik júrgizýshi atalymyn ıelendi.
О́skemen qalasyndaǵy áskerı lazarette qyzmet etetin serjant Anna Golovanovanyń eńbegi «Abzal jan» nomınasııasymen baǵalandy.
Bitimgerlik bıigi
Bitimgerlik mıssııasyndaǵy úlgili qyzmeti úshin maıor Bahtııar Battalov úzdik bitimger atandy. Úzdik baılanysshy – aǵa serjant Rústem Erdenbekov (54380 áskerı bólimi), al saperler arasynda serjant Saǵıt Myńbaı (44859 áskerı bólimi) «Qaısar júrek» atalymymen marapattaldy.
Radıoelektrondyq kúres salasyndaǵy úzdik maman dep kapıtan Medet Kúzembaev (54179 áskerı bólimi) tanyldy. Jedel kezekshi atalymyn podpolkovnık Artýr Mısalım (78639 áskerı bólimi) ıelendi. Tyldyq qamtamasyz etý salasynda kishi serjant Aıbek Esenjolov (44293 áskerı bólimi) úzdik atansa, radıasııalyq, hımııalyq jáne bıologııalyq qorǵaý áskerleriniń úzdik mamany – serjant Ernur Táńirbergen (22534 áskerı bólimi).
Kadr qyzmeti boıynsha maıor Azamat Ashyqov (44803 áskerı bólimi) úzdik dep tanylsa, tárbıe jumysy jónindegi úzdik ofıser atalymy podpolkovnık Renat Qalıdoldınge (12740 áskerı bólimi) buıyrdy. Áskerı polısııa qyzmeti boıynsha úzdik – Aqtaý óńirlik garnızonynyń kishi serjanty Qydyrǵalı Ádilhan.
Otbasy jetistigi
«Mereıli otbasy» baıqaýynda Áýe qorǵanysy kúshteriniń 54835 áskerı bóliminde qyzmet etetin maıor Erlan Shynalıevtiń otbasy jeńiske jetti.
Al «Jyl serpilisi» atalymy elordadaǵy 68665 áskerı bóliminiń «Juldyzdy jigitter» komandasyna berildi. О́nerli ujym «Qazaqstan CUP» lıgasynda júldeli úshinshi oryn alyp, 2026 jyly ótetin «Jaıdarman» ulttyq lıgasyna joldama aldy.
Sondaı-aq «Jas sarbaz daýysy» nomınasııasy Máskeýde ótken «Golos. Detı» baıqaýynda júldeger atanǵan «Jas sarbaz» stýdııasynyń tárbıelenýshisi Jasmına Túzelovaǵa tabystaldy.
Irikteý jumystary 27 nomınasııa boıynsha júrgizildi. Baıqaý jeńimpazdary dıplomdarmen, ataýly músinshelermen jáne aqshalaı syılyqtarmen marapattaldy.
