Ulybrıtanııa elshisimen kezdesti

Máýlen Áshimbaev elshini taǵaıyndalýymen quttyqtaı otyryp, Ulybrıtanııa Qazaqstannyń Eýropadaǵy mańyzdy seriktesteriniń biri ekenin atap ótti. Sondaı-aq ol eki el arasynda dıplomatııalyq qarym-qatynastyń ornaǵanyna 30 jyldan asa ýaqyt ótkenin, búginde ózara baılanys dostyq, senim, qurmet jáne ortaq múddelerge taban tireıtinin aıtty.

«Qazirgi tańda Qazaqstan – Brıtan qa­ty­nastary túrli salada qarqyndy damyp keledi. Eń joǵary deńgeıde berik jáne syndarly saıası dıalog qalyptasty. Byltyr qarasha aıynda Bakýde ótken COP29 jahandyq klımattyq sammıti alańynda Qazaq­stan Prezıdenti Qasym-Jomart Toqaev pen Ulybrıtanııa Premer-Mınıstri Kır Starmerdiń kezdesýi elderimiz arasyn­­daǵy yntymaqtastyqqa jańa ser­pin berdi. Sondaı-aq 2024 jyl­ǵy sáýir­de Birikken Koroldiktiń syrt­qy is­ter mınıstri Devıd Keme­ron­nyń Qazaqstanǵa sapary kezinde Stra­tegııalyq seriktestik pen ynty­maqtastyq týraly kelisimge qol qo­ıyl­ǵany belgili. Qazaqstan Parlam­enti osy kelisimdi iske asyrýǵa óz septigin tıgizýge daıyn», dedi Senat tóraǵasy.

Taraptar parlamentaralyq ynty­maqtas­tyqty keńeıtý máselesine de toqtald­y. Suhbat kezinde eki eldiń Parla­ment­terinde jumys isteıtin dostyq toptary aıasynda ózara is-qımyldy odan ári arttyrý jónindegi mindet belgilendi.

Sonymen qatar palata spıkeri Memleket basshysynyń bastamasymen Qazaqstanda júrgizilip jatqan saıası jáne áleýmettik-ekonomıkalyq reformalarǵa nazar aýdardy. Máýlen Áshimbaev Qazaqstannyń saıası júıesin demokratııalandyrý máselelerine jáne Prezıdent Joldaýyndaǵy jańa bastamalarǵa jan-jaqty toqtalyp, júrgizilip jatqan ózgeristerdiń strategııalyq mańyzyn atap ótti. Sondaı-aq ol Álemdik jáne dástúrli dinder kóshbasshylarynyń sezine únemi qoldaý kórsetip, belsendi qatysyp kele jatqany úshin Anglıkan shirkeýiniń rýhanı ókilderine rızashylyq bildirdi.

О́z kezeginde Sallı Djeın Aksýorsı Parlament Senatymen ekija­qty qarym-qatynastyń keń aýqym­dy máseleleri boıynsha ynty­maq­­tas­tyqty odan ári nyǵaıtýǵa múd­deli ekenin aıtty.