ASTANA. 23 naýryz. Keshe túnde fýtboldan Ispanııa chempıonatynyń 28-týry aıasynda «Barselona» men Madrıdtiń «Realy» kezdesti. Katalonııada ótken oıynda alań ıeleri 2:1 esebimen jeńiske jetti. Bul týraly egemen.kz habarlady.
Oıynnyń 19-mınýtynda Lıonel Messıden pas alǵan Jeremı Mate esep ashyp, komandasyn alǵa shyǵardy. Arada 12 mınýt ýaqyt ótkende Krıshtıaný Ronaldý tarazy basyn teńestirdi. Portýgalǵa nátıjeli pas shyǵarǵan Kárim Benzema ekenin aıta keteıik.
Al ekinshi kezeńde «Barselonanyń» shabýylshysy Lýıs Sýares komandasynyń ekinshi golyn soqty (56-mınýt). Bul joly shabýylshyǵa pasty qorǵaýshy Danı Alves berdi. Sonymen «Kamp Noý» stadıonyna jınalǵan 98 760 kórermen alań ıeleriniń jeńisine kýá boldy. Kezdesý barysynda «Barselona» sapynan 5 oıynshy, al «Realdyń» 6 fýtbolshysy eskertý alǵanyn aıta keteıik. Osylaısha búkil álem kóz tikken kezekti «el klassıko» tarıh qoınaýyna endi.
Atalǵan oıynnan keıin «Barselona» 68 upaımen týrnır kestesinde jeke-dara kósh bastady. Al ekinshi satyǵa jaıǵasqan «Realdyń» enshisinde 64 upaı bar.
Osy rette biz qos komanda arasyndaǵy keıbir derekterge toqtalǵan edik. Endeshe «el klassıkonyń» eń qyzyqty sátterine nazar aýdaraıyq.
- Keshegi oıyn «Barselona» men «Realdyń» resmı jarystardaǵy 230-matchy. Al Ispanııa chempıonatyndaǵy 170-kezdesý.
- Eki komanda arasyndaǵy teketireste «Real» 92 ret jeńiske jetken eken. «Barselona» 90 márte jeńis toıyn toılady. Al 48 oıyn teń aıaqtalǵan.
- Eger tek La Lıgadaǵy oıyndardy alar bolsaq, Madrıdtiń komandasy 71 márte basym túsken. Katalondyqtardyń jeńisi 67-ge teń. Sáıkesinshe, 32 ret qarsylastar jeńimpazdy anyqtaı almady.
- «Real» sońǵy 30 jyldyń ishinde bir-aq ret chempıonat barysyndaǵy eki oıynda da jeńiske jetti. Ol 2007-2008 jylǵy maýsymda tirkeldi. Jalpy, atalǵan klýb tarıhynda La Lıgadaǵy bir maýsymda bolatyn eki «el-klassıkony» 13 ret jeńgen.
- «Barselona» Ispanııa chempıonatynda bir maýsymdaǵy «Realǵa» qarsy eki oıynda 12 márte jeńis toıyn toılaǵan. Sońǵysy ótken maýsymda ǵana tirkelgenin aıta keteıik.
- Eger keshegi oıynda Karlo Anchelottıdiń shákirtteri jeńiske jetken bolsa, qatarynan úsh ret «Barselonadan» basym túser edi. Sebebi, osyndan bir jyl buryn Ispanııa kýbogynyń fınalynda «Real» basty qarsylasynan aılasyn asyrǵany esimizde. Sondaı-aq, bıylǵy chempıonattyń alǵashqy aınalymynda da madrıdtikterdiń mereıi ústem boldy. Alaıda, bul joly «Real» oıynshylaryna ondaı baqyt buıyrmady. Jalpy, atalǵan nátıje sońǵy ret 37 jyl (1978 j.) buryn tirkelgen eken. Ol kezde eki komandadaǵy qazirgi oıynshylardyń bireýi de áli dúnıege kelmegen edi. Al «Barselonanyń» bas jatyqtyrýshysy Lýıs Enrıke ol kezde 8 jasar bala bolsa, Karlo Anchelottı Italııanyń «Parmasynda» óziniń kásibı fýtboldaǵy úshinshi maýsymyn ótkizip júrdi.
- Klýbtyq jáne ulttyq qurama deńgeıindegi matchtarda álemniń qos úzdigi Messı men Ronaldý 28 ret bir-birine qarsy oınaǵan. Sonyń 13-inde argentınalyq jeńiske jetse, Ronaldý 8 márte Messıden basym túsken. 7 oıyn teń aıaqtaldy. Osy 28 oıynda Messı 17 gol soqsa, Ronaldý 16 ret mergendigimen kózge túsken.
- Ispanııa chempıonatynyń bıylǵy maýsymynda bombardırlerdiń kóshin ázirge Messı bastap tur. Osyǵan deıingi 28 týrda ol 32 ret nátıjeli soqqy jasaǵan. Al atalǵan tizimde ekinshi turǵan Ronaldýdyń Messıden bir goly kem (31 gol). Eger qos oıynshynyń bıylǵy La Lıgadaǵy nátıjeli pastaryn sanaıtyn bolsaq, taǵy da Messıdiń alda ekenine kóz jetkizemiz (15:11).
- Messı jyl basynan beri Ispanııa chempıonatynda 17 gol soqty. Mundaı kórsetkishke bıylǵy maýsymda Eýropadaǵy eń úzdik bes chempıonatty (Anglııa, Ispanııa, Germanııa, Italııa, Fransııa) qosa eseptegende eshkim qol jetkizgen joq. Argentınalyqtan keıingi satyda 11 goldan soqqan Garrı Keın («Tottenhem», Anglııa) men Bas Dost («Volsbýrg», Germanııa) tur.
- «El klassıko» tarıhynda Leonel Messı 21 márte mergendigimen kózge túsken. Shabýylshynyń budan kóp gol soqqan oıyny «Barselona» men Madrıdtiń «Atletıkosy» arasyndaǵy aıqasta tirkelgen. Ol búginge deıin «Atletıkomen» bolǵan oıyndarda 22 ret qarsylastaryn qapy qaldyrdy.
- Messıdiń «Barselona» sapyndaǵy kelesi doby resmı oıyndarda soqqan 400-gol bolmaq. Iаǵnı, búginge deıin Leonyń enshisinde «Barselona» úshin soqqan 399 dop bar.
- Lýıs Enrıkeniń kezinde «Barselona» men «Real» sapynda oınaǵany belgili. Ol «el-klassıko» tarıhynda eki komandanyń da qaqpasyna gol soqqan bes fýtbolshynyń bireýi. Enrıkeden bólek, mundaı dárejege Hosıp Samıter, Lýısh Fıgý, Roberto Karlos jáne Ronaldo qol jetkizgen.
- Klýbtyq jáne ulttyq qurama deńgeıindegi oıyndarda Krıshtıaný Ronaldý «Kamp Noý» stadıonynda 9 márte mergendigimen kózge túsken. Ronaldý eń kóp golyn «Realdyń» «Santıago Bernabeý» stadıonynda soqqan (157 gol). Ekinshi orynda «Manchester Iýnaıtedtiń» alańy «Old Trafford» tur (73 gol).
