Forbes málimetinshe, mıllıarderdiń baılyǵy Delaver shtatynyń Joǵarǵy soty tómengi satydaǵy sottyń Tesla aksııalaryna baılanysty Maskke berilgen opsıondardy joıý týraly sheshimi kúshin joıǵannan keıin aıtarlyqtaı artqan. Atalǵan opsıondardyń qazirgi quny 139 mlrd dollardy quraıdy.
Forbes baǵalaýynsha, Ilon Masktiń jalpy baılyǵy rekordtyq deńgeıge jetip, 749 mlrd dollarǵa baǵalanyp otyr.
Sot sheshiminen keıin Tesla qaıtadan Masktiń eń qymbat aktıvine aınaldy. Aksııalarǵa berilgen opsıondardan bólek, oǵan elektromobıl óndirýshi kompanııanyń 12 paıyz jaı aksııasy tıesili. Bul aksııalardyń naryqtaǵy quny 199 mlrd dollardy quraıdy. Osylaısha, Masktiń Tesla-degi aktıvteriniń jalpy quny 338 mlrd dollarǵa jetken.
Sonymen qatar, qarasha aıynda Tesla Maskke bólek, rekordtyq kólemdegi syıaqy paketin usynǵan. Eger kompanııa aldaǵy on jylda naryqtyq kapıtalızasııasyn segiz eseden astam arttyrý sııaqty asa aýqymdy kórsetkishterge qol jetkizse, bul paket Maskke qosymsha aksııalar túrinde 1 trln dollarǵa deıin tabys ákelýi múmkin.
Buǵan deıin Time jýrnaly ótken aptada birden birneshe adamdy «Jyl adamy» dep tanyǵanyn habarlaǵan bolatyn. Basylym jasandy ıntellekt salasynyń negizin qalaýshylaryn atap ótip, olardyń qatarynda Ilon Maskty da atady.
