ASTANA. 23 naýryz. Búgin kásipqoı boksta ult namysyn asqaqtatyp júrgen qos birdeı boksshymyz Qanat Islam men Jańqosh Turarov sharshy alańǵa shyǵady. Atalǵan jekpe-jekter Kolýmbııada ótedi. Bul týraly egemen.kz habarlady.
Ekeýiniń de qarsylastary kolýmbııalyq boksshylar. Qanat Orlando De Hesýs Estradamen WBA Fedelatin tujyrymy boıynsha chempıondyq ataqty sarapqa salady. Al Jańqosh Dýnıs Lınan esimdi boksshymen kúsh synasady. Jekpe-jek keshi búgin túnde Astana ýaqytymen saǵat 02:00-de bastalady. Kolýmbııanyń Telecaribe telearnasy sporttyq sharany tikeleı efırde kórsetedi dep josparlanýda.
Aıta keteıik, alǵashynda Qanat Islamnyń búgingi jekpe-jektegi qarsylasy basqa kolýmbııalyq bolǵan. Iаǵnı, ol chempıondyq ataq úshin Karlos Kalvan esimdi boksshymen kezdesýi tıis edi. Alaıda, kelesi qarsylasy retinde Orlando Estrada bolyp bekitildi. Bul boksshy osyǵan deıin 17 jekpe-jek ótkizip, 11-inde jeńiske jetken. Sonyń toǵyzy nokaýtpen tirkelgen. Alty aıqasyn teń aıaqtasa, bir márte jeńilgen.
Al birinshi orta salmaqta bokstasatyn Qanat búginge deıin 18 jekpe-jek ótkizip, barlyǵynda jeńiske jetti. 15 aıqasyn merziminen buryn aıaqtady. WBA Fedelatin tujyrymy boıynsha chempıondyq ataq ázirge bizdiń boksshyda. Sondaı-aq, Qanattyń WBC International Silve tujyrymy boıynsha da chempıondyqqa talasatyn múmkindigi boldy. Degenmen, atalǵan ataq úshin josparlanǵan tartys ótpeı qaldy. Bul aıqasta qazaq boksshysy argentınalyq Gýıdo Nıkolas Pıttomen judyryqtasýy tıis edi.
Qanat sońǵy jekpe-jegin 2014 jyldyń tamyz aıynda ótkizdi. Sol tartysta boksshymyz kolýmbııalyq Fıdel Monterrosany besinshi raýndta qulatqany esimizde.
Elaman Qońyr.
Derek: egemen.kz.
Sýret: boxingnews.kz.
