ASTANA. 11 mamyr. Qyzylorda oblysy, Qazaly aýdanynda Uly Jeńistiń 70 jyldyǵyna oraı aýdan ortalyǵy Áıteke bı kentinde Tour de Qazaly velomarafony ótti. Oǵan 80-nen astam erikti qatysty. Bul týraly egemen.kz habarlady.
Áıteke bı-Basyqara-Áıteke bı baǵytynda ótkizilgen saıysta 15-tegi jetkinshekten jasy kelgen qarııaǵa deıin baq synady. Jarys jolynyń uzaqtyǵy 45 shaqyrymdy qurady.
Áıteke bı kenti ákimdiginiń qoldaýymen «Zań zańǵary» jaýapkershiligi shekteýli seriktestiginiń júldesi úshin uıymdastyrylǵan sharanyń maqsaty – salaýatty ómir saltyn nasıhattaý, halyqty sportpen belsendi aınalysýǵa tartý.
Jarys qorytyndysy boıynsha stýdent Janbolat Sádý qarsylastaryn shań qaptyryp, birinshi oryndy ıemdendi. Soǵan sáıkes, 50 myń teńge aqshalaı syılyqty qanjyǵasyna baılady. Al 2-oryndy №249 mektep-lıseı oqýshysy Dáýren Beket alsa, úzdik úshtikti Baǵdat Abıkenov túıindedi. Jeńimpazdarǵa qarjylaı syılyqtar tabystaldy.
Budan bólek 10 sportshyǵa arnaıy dıplom men «Altyn orda» fıtnes-klýbyna 12 ret tegin kirýge sertıfıkat tabystaldy. Sondaı-aq, Janseıit Tasbolatqa 2016 jyly Almaty qalasynda ótetin velomarafonǵa joldama tabys etildi. Al erlerden qalyspaı jarysqa túsken Ásem atty qyz bala arnaıy júldege ıe boldy.
Elaman Qońyr.
Derek, sýret: egemen.kz.
