Bıyl mamyr aıynyń basynda Sovico Group Qazaqstandaǵy áýejaılardyń birin satyp alý nemese basqarý múmkindigin qarastyryp jatqany habarlanǵan bolatyn. Keıin Syrtqy ister vıse-mınıstri áńgime Qyzylorda oblysyndaǵy áýejaıdy basqarý jóninde bolǵanyn naqtylaǵan. Maýsym aıynda sheteldik kompanııa óz josparyn keıinge qaldyrǵany belgili boldy.
Ákimniń aıtýynsha, taraptar kelisimge kele almaǵan.
– Biz Sovico Group kompanııasymen kelissózder júrgizdik, alaıda olardyń usynystary bizdi qanaǵattandyrmady. Biz óz sharttarymyzdy aıttyq, olar óz talaptaryn usyndy. Investorlar qosymsha sýbsıdııalaýdy surady, biraq bul ekonomıkalyq turǵydan tıimsiz bolǵandyqtan, biz kelisken joqpyz. Qazirgi ýaqytta ózge de áleýetti ınvestorlar qarastyrylyp jatyr. Degenmen kez kelgen joba eń aldymen memleket úshin tıimdi bolýy kerek. Qaryzy joq, turaqty jumys istep turǵan áýejaıdy sýbsıdııalaý sharttarymen basqa kompanııaǵa bere almaımyz. Bul jumys jalǵasady, – dedi aımaq basshysy.
Onyń sózinshe, qazir áýejaı ózin-ózi aqtap otyr, alaıda tabys kólemi ázirge joǵary emes. Sebebi reıster sany tikeleı suranysqa baılanysty. Qazirgi tańda áýe aılaǵy aptasyna shamamen 29 ushyp-qoný reısine qyzmet kórsetedi.
