Bıyl KEGOC kompanııasynda memlekettik tildi damytý jáne aýdarma jumysyn uıymdastyrý qaǵıdalary, sondaı-aq 2025– 2029 jyldarǵa arnalǵan is-sharalar jospary bekitildi. Osy qujattarda memlekettik tildi qoldanýdyń naqty tártibi men jaýapkershilik belgilenip, árbir bólimshe men qyzmetkerdiń quzyreti aıqyndaldy. Sonyń nátıjesinde kompanııada qujat aınalymynyń basym bóligi qazaq tilinde. Búginde Atqarýshy dıreksııada qujattardyń 95-98 paıyzy, al óńirlik fılıaldarda 99-100 paıyzy memlekettik tilde rásimdeledi. Bul – KEGOC-tiń memlekettik til saıasatyndaǵy mańyzdy kórsetkishi.
Sonymen qatar qyzmetkerlerdiń tildik quzyretin arttyrý – erekshe nazarda. Atqarýshy dıreksııa men fılıaldardy qosa alǵanda 2024–2025 jyldary jalpy 1006 qyzmetker qazaq tilin oqytý kýrstarynan ótti, al aǵylshyn tilin meńgerý maqsatynda 317 maman arnaıy sabaqtarǵa qatysty. Memlekettik tildi meńgerý deńgeıin baǵalaýǵa arnalǵan «QazTest» júıesi boıynsha testileýler júıeli túrde ótkiziledi. Tek bıyldyń ózinde 629 qyzmetker sertıfıkattaý jáne dıagnostıkalyq test tapsyrdy. Bul KEGOC ujymynyń kásibı damýymen qatar, tildik biliktiligin de úzdiksiz jetildiretinin kórsetedi.
Sondaı-aq memlekettik tildiń qoldanylýy tek qujat aınalymymen shektelmeı, óndiristik ortada da órken jaıyp keledi. Máselen, kompanııa balansyndaǵy 83 qosalqy stansanyń ataýy tolyqtaı qazaqshalandy. Barlyq kórneki aqparattar men nusqaǵysh belgiler zań talaptaryna sáıkestendirildi. Mundaı jumys aldaǵy ýaqytta da jalǵasyn tabady. Barlyq tehnıkalyq jáne óndiristik qujattama memlekettik tilde júrgiziledi.
Budan bólek, KEGOC ujymy mádenı-aǵartýshylyq sharalarǵa basa den qoıady. Sol arqyly memlekettik til saıasatyna qoldaý bildiretinin atap ótken abzal. Bıyl uly oıshyl, aqyn Abaı Qunanbaıulynyń 180 jyldyǵyna oraı kompanııa kóleminde aýqymdy is-sharalar uıymdastyryldy. Túrli etnos ókilderi arasynda dıktant jazý, memlekettik tildi jetik meńgergen mamandar arasynda esse baıqaýy, qyzmetkerlerdiń balalary arasynda ádebı oqý saıysy – sonyń bir parasy. Sonymen birge «Abaı – zamana zańǵary» atty teatrlandyrylǵan qoıylym sahnalanyp, jas mamandardyń óneri kórermenderge erekshe áser syılady. Bul shara ujymdyq rýhty kóterip qana qoımaı, korporatıvtik qundylyqtardy nyǵaıtyp, jas býyn qyzmetkerlerdiń jan-jaqty damýyna serpin berdi.
Jalpy, KEGOC-ta memlekettik til saıasatyn damytýǵa arnalǵan jumystar naqty nátıjeli. Qujat aınalymynyń qazaq tilinde tolyqqandy júzege asýy, myńnan astam qyzmetkerdiń oqytý kýrstarynan ótýi, Abaıdyń mereıtoıyna arnalǵan mádenı is-sharalardyń joǵary deńgeıde uıymdastyrylýy – kompanııanyń tek energetıkada ǵana emes, til saıasatyn ilgeriletýde de kóshbasshy ekenin aıǵaqtaıdy.
Memlekettik til KEGOC úshin qaǵaz júzindegi talap qana emes, sonymen qatar, korporatıvtik mádenıettiń ózegine aınalyp keledi.
Qyzǵaldaq Aıtjanova
