Qaraǵandy oblysyndaǵy birqatar medısınalyq nysandy júzege asyrýǵa Arnaýly memlekettik qordan shamamen 7,5 mlrd teńge bólindi. Atap aıtqanda, Qaraǵandydaǵy jańa onkologııalyq ortalyqtyń operasııalyq-reanımasııalyq blogin zamanaýı jabdyqtarmen jaraqtandyrýǵa 6,2 mlrd teńge bólindi. Oblystyq bıýdjetten qosymsha 1,74 mlrd teńge kóleminde birlesip qarjylandyrý kózdelgen. Qazir nysannyń daıyndyǵy 70%-ǵa jetti, ishki árleý jumystary júrgizilip jatyr.
Balqash qalasynda qazir kúrdeli jóndeý júrgizilip jatqan kópbeıindi aýrýhana bazasynda aýdanaralyq medısınalyq hab qurylady. Bul maqsattarǵa 1 mlrd teńgeden astam qarjy bólindi, jalpy quny 1,27 mlrd teńgeni quraıdy. Joba aıasynda angıografııalyq operasııalyq jáne qabyldaý-dıagnostıkalyq bólimshelerdi ornalastyrý úshin qosymsha korpýstyń qurylysy aıaqtalyp jatyr. Búginde nysan 96%-ǵa daıyn. Sondaı-aq qańqany salý, ınjenerlik jelilerdi tóseý jáne ishki árleý boıynsha negizgi jumystar aıaqtaldy. Nysandy osy jyldyń sońyna deıin tapsyrý josparlanǵan.
Sonymen qatar Balqashta balalardy ońaltý ortalyǵy qurylyp jatyr: burynǵy sanatorıı ǵımaratyn qaıta jabdyqtaý úshin 272,1 mln teńge baǵyttaldy. Joba stasıonar jáne ambýlatorııalyq qabyldaýdy uıymdastyrýdy kózdeıdi. Reabılıtologterdi, nevropatologterdi, logopedterdi jáne EDSh nusqaýshylaryn qosa alǵanda, tar beıindi mamandardan turatyn kópsalaly komanda qurylady. Bul balalarǵa oblys ortalyǵyna barmaı-aq sapaly ońaltýǵa qol jetkizýdi qamtamasyz etedi. Josparǵa sáıkes barlyq jumys 2026 jylǵy aqpanda aıaqtalýǵa tıis.
Osy jobalardy júzege asyrý óńirdegi medısınalyq kómektiń sapasyn arttyrady. Osylaısha, angıografııalyq operasııalyq bólimsheni iske qosý «altyn saǵat» qaǵıdasy negizinde jáne pasıentterdiń ómirin saqtaı otyryp, Balqash turǵyndaryna ınfarkt pen ınsýlt kezinde shuǵyl joǵary tehnologııalyq kómek kórsetýge múmkindik beredi. Ońaltý ortalyǵynyń ashylýy turǵylyqty jeri boıynsha erekshe qajettilikteri bar balalar úshin qalpyna keltirý emin úzdiksiz alýdy qamtamasyz etedi.
