Avtosaladaǵy bir jumys orny ózge salalarda da suranys týdyrady. Sarapshylardyń baǵalaýynsha, bir jumys orny logıstıka, qyzmet kórsetý, jetkizý baǵyttarynda taǵy 7-8 adamdy jumyspen qamtýǵa jol ashady. Osylaısha avtonaryq jumyspen qamtýdyń mańyzdy kózine aınalyp keledi.
2025 jyldyń úshinshi toqsanynyń sońynda avtosalada eńbek etetinder sany 9 myńǵa jýyqtady. Bir jylda ósim 40 paıyzdan asty. Mashına jasaý salasyndaǵy jumysshylardyń ishinde avtosalanyń úlesi sońǵy on jylda aıtarlyqtaı artqan. Bıyl Qostanaı oblysy men Almatyda eki jańa zaýyt iske qosylyp, bes myńnan astam adam jumysqa ornalasty.
Jumysshylardyń edáýir bóligi Qostanaı oblysyna tıesili. Munda ornalasqan iri zaýyttar óńir ekonomıkasynyń tiregine aınalyp otyr. Almatyda da avtosaladaǵy jumysshylar sany bir jarym esege ósti. О́zge óńirlerde de bul baǵytta ósim bar.
Salanyń qarqyndy damýy kadr daıarlaý máselesin alǵa shyǵardy. Qazir avtosalada mektepten bastap kolledj, joǵary oqý orny jáne óndiristi baılanystyratyn júıe qalyptasyp keledi. Korporatıvtik oqý ortalyqtary, dýaldy oqytý, oqý oryndarymen tikeleı áriptestik osy qajettilikten týyndady.
Jalpy alǵanda, avtomobıl ónerkásibi óndiristi ǵana emes, eńbek naryǵyn da keńeıtip otyr. Jumysshy mamandyqtaryna suranystyń artýy áleýmettik turaqtylyqqa jáne el ekonomıkasynyń uzaq merzimdi damýyna yqpal etetin faktorǵa aınalyp keledi.
