Kúzdiń sońynda sıyr eti bir jyl ishinde 31,5 paıyzǵa qymbattaǵan. Jeltoqsan ortasyna qaraı ósim birshama baıaýlaǵanymen, 26 paıyzdan joǵary deńgeıde saqtalyp otyr. Qoı eti de edáýir qymbattap, jyldyq ósim 28 paıyzdan asty. Jylqy eti 16 paıyzǵa jýyq ósse, qus etiniń baǵasy salystyrmaly túrde baıaý – 10 paıyz shamasynda kóterilgen.
Baǵanyń sharyqtaýy kóktemniń sońy men jazdyń basynan bastalǵan. Sol kezeńnen beri sıyr eti aı saıyn derlik qymbattap otyrǵan. Jalpy baǵa ósimine de eń kóp áser etken osy ónim.
О́ńirler arasynda aıyrmashylyq bar, alaıda ol asa úlken emes. Almatyda et baǵasy 15 paıyzdan sál assa, Qostanaı, Atyraý jáne Aqtóbe oblystarynda ósim 17-18 paıyz deńgeıinde tirkelgen. Al Ulytaý oblysy men Shymkentte kórsetkish 30 paıyzǵa jýyqtaǵan. Mundaı aıyrmashylyqtar baǵanyń jergilikti sheshimderden emes, jalpy ekonomıkalyq sebepterden ósip otyrǵanyn ańǵartady.
Halyqaralyq salystyrýda Qazaqstan sıyr eti arzan elderdiń qatarynda. Numbeo derekterine sáıkes, jeltoqsan aıynda elimiz sıyr etiniń baǵasy boıynsha 100-den astam eldiń ishinde sońǵy oryndarǵa jaqyn turǵan. Bir keli sıyr etiniń ortasha baǵasy shamamen 3,8 myń teńge. Bul Reseı men О́zbekstandaǵy kórsetkishten tómen. Al Eýropanyń birqatar elderinde sıyr eti Qazaqstanmen salystyrǵanda birneshe ese qymbat.
Baǵanyń ósýine saýda oryndary emes, negizinen óndirýshi taraptaǵy shyǵyndar áser etken. Statıstıka iri qaranyń baǵasy bir jylda shamamen 20 paıyzǵa kóterilgenin kórsetedi. Buǵan jem-shóptiń qymbattaýy sebep bolǵan. Azyqtyq dándi daqyldar men shóptiń baǵasy 9 paıyzǵa jýyq ósse, jemdik júgeri jyl ishinde 16 paıyzdan asa qymbattaǵan.
Soǵan qaramastan, halyq etten bas tartqan joq. Úshinshi toqsanda qazaqstandyqtar bir adamǵa shaqqanda orta eseppen 21 keliden astam et ónimin tutynǵan. Bul ótken jylmen salystyrǵanda joǵary kórsetkish. Eń kóp tutynylatyn ónim – sıyr eti. Odan keıin farsh pen jylqy eti keledi.
Baǵa ósimi otbasylyq bıýdjetke de salmaq túsirip otyr. Úshinshi toqsanda qazaqstandyq otbasylardyń et pen et ónimderine jumsaǵan shyǵyny toqsanyna orta eseppen 180 myń teńgege jýyqtaǵan. Bul sońǵy eki jyldaǵy eń joǵary ósim sanalady.
