– Búgin biz birneshe turǵyn úıdiń kiltin bir mezette tapsyryp otyrmyz. Bul – aýdan turǵyndarynyń turǵyn úı máselesin kezeń-kezeńimen sheshýdegi mańyzdy qadam, – dedi aýdan basshysy Sábıt Ospanov.
2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda salynǵan bes qabatty, 80 páterli turǵyn úı Abaı qalasynyń 30a shaǵyn aýdanynda ornalasqan. Atalǵan úıdegi páterler ıpotekalyq nesıeleý baǵdarlamalary arqyly berilýde.
Sondaı-aq Jeńis dańǵylyndaǵy № 7/2 bes qabatty turǵyn úı men Tolaǵaı tuıyǵyndaǵy bir qabatty úıler jeke qurylys salýshylardan satyp alynyp, áleýmettik osal sanatqa jatatyn azamattarǵa bólindi.
Kópbalaly ana Aıjan Júkenova turǵyn úı kezeginde shamamen 10 jyl turǵan.
– Búgin biz úshin erekshe qýanyshty kún. Endi eki otbasyǵa arnalǵan jer úıde turatyn bolamyz. Bul úılerdiń qalaı salynyp jatqanyn óz kózimmen kórip, osyndaı baspana buıyrsa eken dep armandadym. Munda joldar asfalttalǵan, ortalyq jylý júıesi men káriz júrgizilgen, páterdiń jospary da óte yńǵaıly. Balalarymmen birge jaıly ómir súremiz, – dedi ol.
Abaı aýdanynda turǵyndardy qoljetimdi ári jaıly baspanamen qamtamasyz etý jumystary aldaǵy ýaqytta da júıeli túrde jalǵasyn tabatyny atap ótildi.
Qaraǵandy oblysy
Qasymhan Ǵalym
