Qala ákiminiń orynbasary Meıirjan Muqasovtyń pikirinshe, óńirde erligi umytylmas eren jandar bar. Osyndaı esimderi el esinde saqtalýǵa tıis birtýar perzentterimizdi jas urpaq bilýi qajet.
Esimi el jadynan óshpeıtin jannyń biri – Halyq qaharmany Hıýaz Dospanova. Osy kezge deıin batyr ushqyshtyń atymen «SMP-163» shaǵyn aýdanyndaǵy shaǵyn kóshe atalǵan edi. Endi qaharmannyń esimi basqa kóshege berildi.
«Halyq qaharmany Hıýaz Dospanovanyń esimi berilgen Lýgovaıa kóshesiniń uzyndyǵy shamamen bir shaqyrymǵa sozylady. Bul kóshe «Avangard» turǵyn alabynyń 2 jáne 4-shaǵyn aýdanynyń aralyǵymen ótip, «Mereı» bazarynan «Jeńis» saıabaǵyna qaraı sozylyp jatyr», dep habarlady M.Muqasov.
Taǵy bir maıdanger – Atyraý oblysynyń qurmetti azamaty Orynǵalı Qarasaev. Qıyr Shyǵysta 13-teńiz atqyshtar brıgadasynyń tank polkinde jaýǵa qarsy shaıqasty. Elge 1947 jyly ǵana oralǵan. Beıbit ómirde óńirlik deńgeıde basshylyq qyzmetti atqaryp, oblystyq ardagerler keńesin basqardy. Endi «Samal» shaǵyn aýdanyndaǵy №2 ótkel maıdangerdiń atymen atalǵan kóshege aınaldy.
Ákim orynbasarynyń deregine súıensek, qyzmettik mindetin atqarý kezinde qaza tapqan eki polıseıdiń esimin №14 jáne 15-ótkelge berý uıǵarylypty. Endi qos ótkel ataýy bar kósheler qataryn tolyqtyrdy.
«Qaza tapqan tártip saqshysy Shalqar Aqymǵalıev jol-patrýldik polısııa batalonynda qyzmet atqardy. Ol 2019 jyly Jaıyq ózenine batyp bara jatqan qyzdy qutqarý kezinde qaza tapty. Al kishi serjant Nurbergen О́temisov kezekshilik kezinde qashyp bara jatqan quqyq buzýshynyń kóligin toqtatpaq bolǵan. Sol kezde avtokólik qaǵyp ketip, alǵan jaraqaty saldarynan kóz jumdy», dep málim etti M.Muqasov.
Atyraý oblysy
