Sýret: cjm.kz
Muny bizdiń kolledjde daıarlanyp jatqan bolashaq jas kadrlardyń sanasyna talmaı sińirip kelemiz. Sebebi ár jas maman ózi ıgergen kásiptiń mańyzyn, onyń qoǵamdaǵy qajettiligin eń áýeli sezine alýy kerek.
Pavlodar mashına jasaý kolledjinde 7 jyldan beri jumys isteımin. Osy ýaqytqa deıin júzdegen túlek túlep ushyp, olardyń barlyǵy derlik jergilikti kásiporyndardan «eki qolǵa – bir kúrek» tapty. Oblys ortalyǵyndaǵy «ERG Servis», «Qazaqstan alıýmınııi», «KSP Steel» syndy iri zaýyttar, ózge de jóndeýshi, qurastyrýshy kásiporyndar tarapynan biz daıarlaıtyn mamandarǵa suranys turaqty. Kadr daıarlaý isinde únemi izdeniste bolmasań, básekege qabiletti mamandardy qalyptastyrý kúrdeli is. Jyl saıyn tehnıkalyq, kásiptik bilim berý salasyndaǵy túrli baıqaý-syndarǵa qatysamyz. Bıyl respýblıkalyq kásibı sheberlik baıqaýynda ınjenerlik sala boıynsha 1-oryndy jeńip aldym. Shákirtim Danııl Ýsanov E RG Skills 2025 III korporatıvtik kásibı sheberlik baıqaýynda «CAD ınjenerlik grafıkasy» quzyrettiliginde jeńimpaz atandy.
Oqytý salasynda birqatar ózindik jobamyz bar. Aldymyzda bilim berý baǵdarlamalaryn ónerkásippen tyǵyz baılanystyrý, mazmunyn baıytý mindetteri tur. Munyń barlyǵy zamanǵa saı, tereń bilimdi, tehnologııalyq saýatty, sıfrlyq ıgilikterdi meńgergen jas mamandar býynyn daıarlaýda óte mańyzdy.
Nursultan BAIDILDIN,
Pavlodar mashına jasaý kolledjiniń arnaıy pánder oqytýshysy
