Qazaq soldaty «Berlınge barar jol» fılminen kórindi (foto)

ASTANA. 11 mamyr. Reseılik Sergeı Popov pen Karen Shahnazarovtyń jazýshy Emmanýıl Kazakevıchtiń povesi boıynsha Jeńis meıramy qurmetine keńestik kıno roýd-mývı rýhynda túsirilgen «Berlınge barar jol» fılmi prokatqa jol tartty. Bul týraly Lenta.ru habarlady. Nemisterden qoryqqan leıtenant Ogarkov jaýyngerlik tapsyrmany oryndaı almaı qaıtady da, atý jazasyna kesiledi. Ony armııa shtabyna qatardaǵy jaýynger, úndemes qazaq soldaty Jorabaev aıdap aparady. Túpkilikti trıbýnalǵa jetkenge deıin bul ekeýine jolaı maıdan shebin qıyp ótip, qorshaýdan shyǵýǵa, aqyr sońynda bir-birine degen jekkórinishti kózqarasty qaıta qaraýǵa týra keledi. «Berlınge barar jol» lentasynyń sıýjeti buǵan deıin «Juldyz» povesi boıynsha eki ret kıno túsirilgen Emmanýıl Kazakevıchtiń «Daladaǵy ekeý» povesi men Konstantın Sımonov kúndelikteriniń fragmentteri boıynsha túzilgen. Aıtqandaı, jazýshy Borıs Vasılevtiń «Al munda tap degen typ-tynysh» («A zorı zdes tıhıe») povesiniń jaqynda taǵy qaıtalanyp túsirilýi ádebı mánbeniń kórermenge ekrannan neni kóre alatynyna júz paıyz kepildik bere almaıtynyn, onyń qazirgi tańda ýaqyt tezinen ótip kelgen mátindi avtordyń qaı qyrynan kóre bilgenine baılanysty bolyp shyǵatynyn aıǵaqtap berdi. Alaıda, serıaldar rejısseri bolyp mamandanǵan Sergeı Popov qoıǵan, al tıtr boıynsha Karen Shahnazarov kórkemdik jetekshi mindetin atqarǵan «Berlınge barar jol» povesiniń ekrandyq kóshirmesi onyń túpnusqadan asa kóp aýytqyp ketpegenin kórsetti. Avtorlar mátinge ǵana qurmetpen qarap qoıa salmaı, onyń ıntonasııasy men yrǵaǵyn da sol qalpynda saqtap qalýǵa tyrysqan. Osylaısha keńes zamanynan bergi áskerı kınoklassıkanyń qaǵıdalaryna beriktigin kórsetken. Qaırat Qulymbet. Derek, sýret: Lenta.ru.