Kollajdy jasaǵan – Záýresh SMAǴUL, «EQ»
Jastardyń quqyqtyq mádenıetin arttyryp, sybaılas jemqorlyqqa qarsy kózqarasyn qalyptastyrýdy maqsat tutqan jıynǵa mektep oqýshylary, kolledj jáne joǵary oqý oryndarynyń stýdentteri, sondaı-aq qoǵamdyq uıym ókilderi qatysty. Forýmnyń ashylýynda Abaı oblysy Ishki saıasat basqarmasynyń basshysy Jarqyn Jumadilov qatysýshylarǵa sáttilik tileı otyryp, atalǵan is-sharanyń qoǵamdaǵy mańyzyn aıtty.
«Memleket basshysy Qasym-Jomart Toqaev Qazaqstan halqyna Joldaýynda «Biz zań men tártip, bilim men parasat ústemdik etetin qoǵam qurýymyz kerek», dep atap ótti. Bul mindettiń tabysty oryndalýy jas urpaqtyń boıyna adaldyq, jaýapkershilik jáne azamattyq mádenıetti sińirýge tikeleı baılanysty. Sybaılas jemqorlyq – kez kelgen memlekettiń damýyn tejeıtin qaýipti qubylys. Oǵan eń tıimdi qarsy shara – aldyn alý, ıaǵnı sanany ózgertý jáne bilim arqyly qoǵamdyq mádenıetti qalyptastyrý. Búgingi forým – osy maqsatqa baǵyttalǵan mańyzdy bastamanyń biri», dedi J.Jumadilov.
Forým qatysýshylary qoǵamdaǵy adaldyq, ádilettilik jáne jaýapkershilik qundylyqtaryn qalyptastyrý jónindegi pikirlerimen bólisti. Shákárim ýnıversıtetiniń rektory Dýman Orynbekov, oblys bilim basqarmasynyń basshysy Baýyrjan Erdembekov, jastar belsendisi Qýanysh Moldaqashev, R.Baıseıitov atyndaǵy Semeı qarjy-ekonomıkalyq kolledjiniń stýdenti Nazerke Kadekova jas býynǵa arnalǵan jańa profılaktıkalyq baǵdarlamalardy tanystyryp, óz kózqarasyn bildirdi. Rektor Dýman Orynbekov bilim ornyndaǵy adaldyq qaǵıdatyn nyǵaıtý jóninde atqarylyp jatqan jumystaryn tanystyrdy.
«Ýnıversıtet tarapynan adaldyq qaǵıdatyn qalyptastyrý maqsatynda stýdentterimiz ózderiniń tyń ıdeıalary men jobalaryn usynyp keledi. Bul bastamalar jastardyń jaýapkershiligin arttyryp qana qoımaı, akademııalyq adaldyq mádenıetin nyǵaıtýǵa zor úlesin qosyp jatyr. Sonyń nátıjesinde biz oqý ornynda jańa baǵyttarǵa bet buryp, ashyqtyq pen ádildikke negizdelgen ortany qalyptastyrýǵa múmkindik alyp otyrmyz», dedi rektor.
Taǵy bir mańyzdy baǵyt – óńirde júzege asyrylyp jatqan «Adal azamat» birtutas tárbıe baǵdarlamasy. Bul baǵdarlama mektepke deıingi kezeńnen bastap quqyqtyq saýat, azamattyq jaýapkershilik jáne ádildik qaǵıdattaryn qalyptastyrýdy kózdeıdi. Qazirgi tańda óńirdegi 286 mektepte 7 375 oqýshyny qamtıtyn «Adal urpaq» klýbtary, sondaı-aq 30 stýdenttik klýbta 490 stýdent jumys isteıdi.
«Bizdiń basty mindetimiz – jas urpaqqa jaýapty azamattyq qasıetterdi sińirip, olardy adal jáne quqyqqa qurmetpen qaraıtyn azamattar retinde tárbıeleý. «Adal azamat» baǵdarlamasy mektepten bastap quqyqtyq saýat, ádildik pen adaldyq qaǵıdattaryn qalyptastyrýǵa baǵyttalǵan. Quqyqtyq mádenıet júıeli túrde engizilgen jaǵdaıda oqýshylardyń quqyqtyq saýaty artyp, mekteptegi tártip deńgeıi nyǵaıady, sybaılas jemqorlyqqa tózbeýshilik mádenıeti qalyptasady, ádildik, adaldyq jáne jaýapkershilik qundylyqtary oqýshylardyń minez-qulqynyń negizine aınalady», dedi B.Erdembekov.
Abaı oblysy
