Foto: Polisia.kz
Buǵan deıin áleýmettik jelilerde qalanyń meıramhanalarynyń birinde bolǵan oqıǵanyń beınejazbasy taraǵan edi. Beınejazbada meıramhana qonaǵy men mekeme ákimshisi arasynda janjal týyndaǵan.
Atalǵan oqıǵa boıynsha Medeý aýdandyq polısııa basqarmasynyń qyzmetkerleri tekserý júrgizip, janjalǵa qatysy barlardy anyqtap, olardan túsinikteme aldy. Oqıǵanyń barlyq mán-jaıy muqııat zerdelendi.
«Tekserý barysynda taraptar jaǵdaıdyń emosııalyq áserden týyndaǵanyn atap ótti. Olardyń aıtýynsha, keıbir sózder men áreketter ashý ústinde jasalǵan jáne olardyń shynaıy ustanymyn bildirmeıdi», dep habarlady polısııa.
Sondaı-aq janjal barysynda taraptardyń bir-birine jeńil dárejede fızıkalyq áser qoldanǵany anyqtaldy.
«Eki tarap ózara keshirim surap, tatýlasty jáne bolǵan jaǵdaıǵa ókinish bildirdi. Sonymen qatar olar azamattardy bir-birine qurmetpen qarap, kez kelgen kelispeýshilikti beıbit jolmen sheshýge shaqyrdy», dep atap ótti departament ókilderi.
Sonymen birge tekserý nátıjesinde janjalǵa qatysqan taraptardyń áreketterine quqyqtyq baǵa berildi. Eki qatysýshyǵa da usaq buzaqylyq faktisi boıynsha ákimshilik is qozǵalyp, sot sheshimimen olar 20 AEK mólsherinde aıyppul túrindegi ákimshilik jaýapkershilikke tartyldy.
Polısııa turmystyq kelispeýshilikter, qarym-qatynas nemese til máseleleri eshqashan janjalǵa, arandatýǵa jáne qoǵamdyq tártipti buzýǵa sebep bolmaýy tıis ekenin eske saldy.
«Ultaralyq nemese tildik taqyryptarda arandatýshylyq jasaý – jol berilmeıtin áreket jáne ol qoǵamdyq qaýipsizdikke qater tóndiredi», dep atap ótti departamentte.
Quqyq qorǵaý organdary «qoǵamymyzdyń negizi – ózara qurmet, birlik pen kelisim» ekenin taǵy da eske saldy.
«Almaty qalasynyń polısııa departamenti zańnama aıasynda qatań jumys isteıdi, barlyq azamattardyń zań aldyndaǵy teńdigin qamtamasyz etedi jáne janjaldardy uıymdastyrýǵa nemese arandatýǵa qatysy bar tulǵalar zańda belgilengen jaýapkershilikke tartylatynyn eskertedi», dep tolyqtyrdy vedomstvo.
Aıta keteıik, Shymbulaqtaǵy «Gusto» meıramhanasynda ákimshi qazaq tilinde qyzmet kórsetýden bas tartyp, qonaqqa dóreki sóılegeni úshin synǵa qalǵan edi. Áleýmettik jeli qoldanýshysynyń aıtýynsha, ol qazaqsha qyzmet kórsete alatyn daıashy bar-joǵyn suraǵanda, ákimshi buǵan mindetti emes ekenin aıtyp, dóreki jaýap bergen.
