Foto: istockphoto.com
Qarjy naryǵyn retteý jáne damytý agenttigi júrgizgen zertteý nátıjesi boıynsha, búginde árbir úshinshi azamat tólemdi qolma-qol jasaýdy jón kóredi. Mamandardyń boljamynsha, keler jyly jańa Salyq kodeksi kúshine engen soń, bul úrdis tipti údeýi múmkin. Sebebi «jappaı baqylaý» prınsıpi boıynsha barlyq qolma-qol operasııalar memlekettik organdarǵa tolyq ashyq bolady.
«Qazir kompanııalar qolma-qol aqsha úshin arnaıy jeńildikter usynyp jatyr, aldaǵy ýaqytta bul naryqta keń etek jaıady. Mysaly, quny 5 mln teńge turatyn taýardy qolma-qol satyp alsańyz, sizge 10% jeńildik usynýy múmkin. 500 myń teńge únemdeý kez kelgen adam úshin úlken ýáj. Mundaı aqsha úshin bankomatqa deıin barý esh qıyndyq týdyrmaıdy», dedi «Ulagat Consulting Group» kompanııasynyń dırektory Marat Qaıyrlenov.
Sonymen qatar saýalnama el turǵyndarynyń qarjylyq ahýaly áli de kúrdeli ekenin kórsetti. Respondentterdiń 35%-y turaqty túrde aqsha tapshylyǵyn sezinse, taǵy sondaı bóligi shyǵyndardyń joǵarylyǵynan jınaq jasaýǵa múmkindigi joq ekenin aıtqan. Tek úshten bir bóligi ǵana aı saıyn belgili bir somany shetke ysyryp qoıa alady.
