Foto: Aqorda
Premer-mınıstr elimizdiń bıylǵy áleýmettik-ekonomıkalyq damýynyń aldyn ala qorytyndylary týraly esep berdi. Prezıdenttiń ekonomıkany ártaraptandyrý jónindegi tapsyrmasyn oryndaý nátıjesinde ishki jalpy ónim ósiminiń 70 paıyzdan astamyn ónerkásip, saýda jáne kólik salalary qamtamasyz etip otyr.
2025 jyldyń qańtar-qarasha aılary aralyǵynda kólik qyzmeti 20,3 paıyzǵa, qurylys 14,7 paıyzǵa, saýda 8,8 paıyzǵa, aýyl sharýashylyǵy 6,1 paıyzǵa, óńdeý ónerkásibi 5,9 paıyzǵa ulǵaıǵan. Negizgi kapıtalǵa salynǵan ınvestısııa 18,5 trıllıon teńgeni qurap, jeke ınvestısııalardyń kólemi 9,8 paıyzǵa ósken.
Memleket basshysyna makroekonomıkalyq turaqtandyrý, halyqtyń ál-aýqatyn arttyrý boıynsha Úkimet, Ulttyq bank pen Qarjy naryǵyn retteý jáne damytý agenttiginiń 2026-2028 jyldarǵa arnalǵan birlesken is-qımyl baǵdarlamasyn júzege asyrý jaıynda málimet berildi. Halyqtyń naqty tabysyn arttyrý, turmys deńgeıin jaqsartý arqyly ishki jalpy ónimniń ósimin qamtamasyz etý negizgi basymdyq sanalady. Inflıasııa deńgeıin tómendetý sharalary qarastyrylyp jatyr.
Oljas Bektenov jeltoqsan aıynda shekaradaǵy bes ótkizý beketin jańǵyrtý jumystary aıaqtalǵanyn aıtty. Qazaqstandyq taýar óndirýshilerdiń reestri iske qosyldy. Shaǵyn bıznesti qoldaýǵa arnalǵan «Isker aımaq» biryńǵaı baǵdarlamasy qabyldandy.
Budan bólek, Premer-mınıstr jylytý maýsymy jaıynda esep berdi. Sondaı-aq 2026 jylǵy dala jumystaryn qarjylandyrý erte bastalǵanyna toqtaldy. Bul shara aýyl sharýashylyǵy ónimderin óńdeý men eksportqa den qoıa otyryp, egis alqaptarynyń kólemin saqtaýdy jáne ony ulǵaıtýdy kózdeıdi.
Prezıdent Úkimet basshysyna azamattardyń múddesine saı elimizdiń turaqty damýyn qamtamasyz etý baǵytyndaǵy jumysty jalǵastyrýdy tapsyrdy. Investısııa tartý, kásipkerlikti qoldaý, ınjenerlik jáne kólik ınfraqurylymyn jańǵyrtý boıynsha birqatar naqty mindet júktedi.
