Sharanyń qurmetti qonaqtary qatarynda Qazaqstan Ulttyq Olımpıadalyq komıtetiniń bas hatshysy Álimjan Aqaev, Týrızm jáne sport mınıstriniń orynbasary Serik Jarasbaev, Astana qalasy ákiminiń orynbasary Erik Meıirhan boldy.
«Elordada turaqty túrde sportpen aınalysatyn turǵyndardyń úlesi 42%-ǵa jetti. Tek 2025 jyldyń ózinde jeke demeýshilerdiń esebinen Sana Sport, QazSwimAcademy, Kodokan Spirit, Alpha Gym, Bekzat Sattarhanov atyndaǵy sport kesheni jáne Ozen Fitness sport akademııasy paıdalanýǵa berildi. Buqaralyq sportty damytý maqsatynda «Aulafit», «Funny Sport» jobalary júzege asyrylýda. Al kásibı sportta elordalyq sportshylar 1400-den astam jarysqa qatysyp, 5 myńǵa jýyq medal jeńip aldy. Sonymen qatar, sportshylarymyz 2026 jyly Mılan qalasynda ótetin qysqy Olımpıada oıyndarynyń lısenzııasyn jeńip alyp, qarqyndy daıyndalyp jatyr. Ulttyq sport baǵytyna da mán berilip, 2026 jyly jańa sport mektebin ashý josparlanyp otyr», dedi Astana qalasy ákiminiń orynbasary Erik Meıirhan.
Kesh barysynda estrada ánshileri óner kórsetip, merekelik kóńil kúı syılady. Jyldyń úzdik sportshysy ataǵy eki dúrkin álem chempıony boksshy Sanjar Táshkenbaıǵa buıyrdy. Jyldyń úzdik jattyqtyrýshysy nomınasııasy Merýert Balǵynbaevaǵa berildi. Ol bıyl jasóspirimder arasynda tuńǵysh álem chempıonyn jáne toptyq jattyǵýdan Azııa chempıonyn daıarlady. Jyl serpini marapaty Aqmaral Erekeshevaǵa buıyrdy. Maýsym aıynda jasóspirimder arasynda uıymdastyrylǵan Bolgarııadaǵy álem chempıonatynda Aqmaral Erekesheva tarıhı altyn medaldi jeńip aldy. Jyl serpini (para sportshy) atanǵan Álı Turǵanbekov te bıylǵy jyldy tabysty aıaqtady. Jeltoqsan aıynda Birikken Arab Ámirliginde ótken jasóspirimder arasyndaǵy V Azııa Para oıyndarynda júzýden synǵa túsip, 1 altyn, 3 kúmis medaldi oljalady. Úzdik para sportshy ataǵyna Nıkıta Ermakov laıyq dep tanyldy. Qyrkúıek aıynda para armrestlıngten ótken álem chempıonatynda top jardy. Sondaı-aq para nysana kózdeýden qazan aıynda Birikken Arab Ámirliginde ótken álem kýboginde qola medaldi enshiledi. Paralımpıadalyq sporttyń úzdik jattyqtyrýshysy atalymynda jeńimpaz bolǵan Mıhaıl Býrchalın para sportshy Nıkıta Ermakov pen Parıj Paralımpıadasynyń qatysýshysy Sevda Alıevany jattyqtyrady. Para nysana kózdeýden Astana qalasynyń damýyna úles qosyp júr.
Ulttyq sport túrlerinen úzdik jattyqtyrýshy ataǵyn alǵan Nurjan Qonarbaev 2025 jyly toǵyzqumalaqtan Azııa chempıony men álem kýboginiń jeńimpazdaryn baptady. Onyń jetekshiligimen 10 Qazaqstan Respýblıkasynyń sport sheberi jáne halyqaralyq dárejedegi 4 sport sheberi daıarlandy. Ulttyq sport túrlerinen úzdik sportshy atalymynda úzdik shyqqan Saǵyndyq Áshim Qazaq kúresinen halyqaralyq dárejedegi sport sheberi. 2025 jyly áskerı qyzmetshiler arasyndaǵy álem chempıony, Álem kýboginiń jeńimpazy.
Balalar men jasóspirimderdiń shaıbaly hokkeıden №10 mamandandyrylǵan sport mektebiniń hokkeı komandasy Jyldyń úzdik komandasy dep tanyldy. Shaıbaly hokkeıden Jastar hokei lygasy-nyń 2024/2025 jylǵy maýsymynda «Astana» klýby top jardy. Úzdik sporttyq nysan – «Ozen Fitness» kesheninde sý sporty túrlerinen Qazaqstandaǵy birinshi sport akademııasy. Qazirgi sátte 850 bala jattyǵady. Osy sport kesheninde ulttyq jáne jastar quramasynyń músheleri ázirlik júrgizedi. Úzdik qalalyq sport federasııasy atalymynda Gımnastıka túrleri boıynsha Astana qalasynyń federasııasy tanyldy.
2025 jyly sporttyq, kórkem jáne batýttyq gımnastıkadan el ishinde jáne halyqaralyq jarystarda kóptegen medaldardy jeńip aldy. Ulttyq quramanyń kóptegen sportshylary osy jerde jattyǵady. Jyldyń úzdik sporttyq uıymy nomınasııasy Astana qalasy ákimdiginiń Múmkindigi shekteýli tulǵalarǵa arnalǵan «Elorda» sport klýbyna buıyrdy. Atalǵan sport klýby búgingi tańda tórt baǵyt boıynsha júıeli ári nátıjeli jumys júrgizip keledi. Klýb quramynda tirek-qımyl apparaty zaqymdalǵan, estý jáne kórý qabileti tómen, sondaı-aq zııatkerlik damý erekshelikteri bar sportshylar bar. 2025 jyly respýblıkalyq jáne halyqaralyq jarystarda 587 medal jeńip aldy. Sondaı-aq Qazaqstan Respýblıkasynyń 7-nshi Para Spartakıadasynda 17 sport túrinen jalpy komandalyq esepte 1-oryn ıelendi. Úzdik sporttyq telearna – «QAZSPORT» telarnasy, Úzdik sporttyq portal – Elordainfo.kz aqparattyq portalyna berildi.
Jeńimpazdar arnaıy estelik syılyqtary men maqtaý qaǵazyna ıe boldy.
