Merekelik barokko keshi

Merekelik keshte teatr­dyń jetekshi solıs­­teri, kameralyq or­kestr men balalar hory bir sah­nada óner kórsetti. Atap aıtsaq, Qazaqstannyń eńbek sińirgen qaıratkeri, messo-soprano Tatıana Vısınskaıa, sopranolar Ásem Sembına men Leıla Alamanova, tenor Álıhan Zeınolla, barıton Sultan Baqytjan tyńdarmanyn qýantty. Sondaı-aq sırek kezde­se­tin kontrtenor daýysynyń ıesi Batyrjan Smaqov, skrıpkashy Mádına Kapeý men altshy Gúlnar Tileýǵabylova shaqyrylǵan ártis­ter re­tinde keshtiń kórkemdik bo­ıaýyn baıytty.

Tyńdarman nazaryna barokko dáýiriniń uly kompozıtorlary – Antonıo Vıvaldı, Georg Frıdrıh Gendel, Franchesko Dýrante, Djýlıo Kachchını shyǵar­ma­­larymen qatar Volfgang Amadeı Mosart, Jıýl Massne, Djakomo Pýchchınıdiń tańdaýly týyndylary usyny­ldy. «Astana Operanyń» kame­ra­lyq or­kestrin dırıjer, «Qurmet» or­deni­niń kavaleri Rýslan Baımýrzın basqarsa, fortepıanoda Qazaq­­stan­nyń eńbek sińirgen qaıratkeri Raýshan Beskembırova oınady.

Keshtiń áserli sátteriniń biri – F.Grýberdiń álemge áıgili «Tym-tyrys tún» kompozısııasyn Altynǵanym Ahmetova men Shyryn Ahmedjanova jetekshilik etetin «Astana Opera» balalar teatrlyq stýdııasy horynyń oryndaýy boldy. Jas vokalısterdiń balǵyn da­ýysy konsertke erekshe náziktik pen shynaıylyq darytyp, merekelik atmosferany tereńdete tústi.

Merekelik konsert kórermen tarapynan zor yqylasqa ıe bolǵan «Bel Canto mýzykalyq salony» toptamasy aıasynda ótti. Jobanyń avtory ári ıdeıalyq shabyt berýshisi Raýshan Beskempirova bul format Kameralyq zaldy shyǵarmashylyq erkindik pen kórkemdik izdeniske jeteleıtinin aıtady.

– «Bel Canto mýzykalyq salony» – ártister úshin de, tyńdarman úshin de erekshe suhbat alańy. Munda biz ár dáýirdiń vokaldyq jáne aspaptyq jaýharlaryn erkin usy­na alamyz. Kameralyq zal – naǵyz shyǵar­ma­shylyq zerthana, – deıdi pıanıst.

Bıylǵy merekelik keshtiń repertýarynan Antonıo Vıval­dı­diń tereń lırıka men saltanatty rýhty toǵystyrǵan «Nisi Dominus» týyndysy aıryqsha oryn aldy. Bul shyǵarma Kameralyq zal sahnasynda alǵash ret tolyq, toǵyz bólimnen turatyn nusqada oryndalyp, ony kontrtenor Batyrjan Smaqov oryndady.