Foto: Ashyq derekkóz
Oralda erli-zaıyptylar resmı nekede turǵan jáne úsh kámeletke tolmaǵan balasy bar. Qazirgi ýaqytta balalar anasynyń tárbıesinde. Neke buzylǵannan keıin sot sheshimimen balalaryn asyraý úshin ákesinen barlyq tabysynyń 1/2 bóligi mólsherinde alıment óndirilgen.
Otbasynyń 14 jastaǵy qyzy 2018 jyldan bastap 2027 jylǵa deıin densaýlyq múmkindigi shekteýli bala retinde tirkeýde tur. Ol nevropatolog pen ortopedtiń dıspanserlik esebinde, dıagnozy – serebraldy sal aýrýy (DSP), jambas súıeginiń ekijaqty spastıkalyq shyǵýy jáne tize býyndarynyń búgilý kontraktýrasy. Qozǵalys múmkindiginiń shektelýine baılanysty anasy balasyna turaqty kútim jasap, emdeý shyǵyndaryn kóterip keledi.
Ákesi kúzetshi bolyp jumys istegenine qaramastan, bes jyl ishinde alıment boıynsha qaryzy shamamen 9 mln teńgege jetken. Ol qaryzdyń paıda bolýyn burynǵy jubaıynyń balalarmen aralasýyna kedergi keltirýimen jáne densaýlyǵyna baılanysty jumys isteı almaǵanymen túsindirgen. Alaıda sot bul ýájderdi negizsiz dep tanydy.
Sotta onyń eńbekke jaramsyzdyǵyn rastaıtyn dálelder usynylmaǵany, múgedektigi joq ekeni jáne turaqty tabys tabýǵa qabiletti ekeni anyqtaldy. Bul onyń tek balalarǵa ǵana emes, sondaı-aq múgedektigi bar balaǵa kútim jasap otyrǵan burynǵy jubaıyna da alıment tóleý múmkindigin kórsetedi.
Barlyq mán-jaıdy, kámeletke tolmaǵan balanyń aýyr densaýlyq jaǵdaıyn erekshe jaǵdaı retinde eskere otyryp, sot talapty ishinara qanaǵattandyrý týraly sheshim qabyldady. Nátıjesinde jaýapkerden múgedektigi bar ortaq bala 18 jasqa tolǵanǵa deıin oǵan kútim jasaıtyn burynǵy jubaıynyń paıdasyna aı saıyn 15 AEK mólsherinde alıment óndirý belgilendi. Tólem talap aryz sotqa berilgen kúnnen bastap esepteledi.
