Japonııa astanasynda jalaýy jelbiregen alamanǵa Jambyl oblysynan 7 sport túri boıynsha 12 sańlaq qatysyp, 1 altyn, 3 kúmis, 2 qola júldemen oralǵan bolatyn. Jekeleı jáne komandalyq jarystarda áýlıeatalyq sportshylar erekshe kózge tústi. Erkin kúresten Ǵabıt Esjanov 57 keli salmaqta kúmis medal jeńip alsa, 74 keli salmaqta beldesken Ǵasyr Turǵynbaı qola júldeni qanjyǵasyna baılady.
Dzıýdo sportynan da óńir sportshylary joǵary nátıje kórsetti. Anna Kramorova jekeleı synda qola medal ıelense, áıelder arasyndaǵy komandalyq esepte kúmis júldeger atandy. Bul quramda óner kórsetken Ferıde Kara Ogly da komandalyq synnyń kúmis medalin jeńip aldy. Al erler arasyndaǵy komandalyq jarysta Aıdos Túgelbaev bastaǵan qurama qarsylastarynan oq boıy ozyp, altyn medalǵa qol jetkizdi.
Kezdesý barysynda sóz alǵan óńir basshysy E. Qarashókeev el namysyn abyroımen qorǵaǵan saıypqyrandardyń jeńisti joryǵy keıingi tolqyn úshin úlgi-ónege ekenin atap ótti.
Saltanatty basqosýda XXV jazǵy Sýrdlımpıada oıyndarynyń jeńimpaz-júldegerlerine Taraz qalasynan beriletin 1, 2 jáne 3 bólmeli páterlerdiń sertıfıkaty, barlyq jarysqa qatysýshylar men olardyń jattyqtyrýshylaryna Túrkııa memleketinde ótetin saýyqtyrý oqý-jattyǵý jıynyna joldama tabystaldy.
Taraz
