COVID-19 pandemııasy juqpaly aýrýlar men epıdemııalardyń adamdardyń ómirine jáne áleýmettik-ekonomıkalyq damýǵa, ásirese eń kedeı ári eń osal elderde, qandaı apatty saldar ákelýi múmkin ekenin aıqyn kórsetti. Bul týraly Birikken Ulttar Uıymy 27 jeltoqsanda atap ótiletin Halyqaralyq epıdemııalarǵa daıyndyq kúnine oraı eske saldy.
Epıdemııalar men pandemııalar ulttyq densaýlyq saqtaý júıelerine shamadan tys júkteme túsiredi, jahandyq jetkizý tizbekterin buzady jáne halyqtyń osal toptaryna, sonyń ishinde áıelder men balalarǵa qatty áser etedi.
Halyqaralyq qaýymdastyq tarapynan jetkilikti kóńil bólinbegen jaǵdaıda, bolashaq epıdemııalar aýqymy men aýyrlyǵy jaǵynan aldyńǵy indetterden de asyp túsýi múmkin. Osyǵan baılanysty aqparattandyrýdy arttyrýǵa, ǵylym, bilim men ozyq tájirıbe almasýǵa, sondaı-aq jergilikti, ulttyq, óńirlik jáne jahandyq deńgeılerde bilim berý jáne aǵartýshylyq baǵdarlamalardy damytýǵa erekshe mán beriledi.
BUU sondaı-aq epıdemııalardyń aldyn alý sharalaryn kúsheıtýdiń jáne kez kelgen bolashaq qaýipterge jedel ári tıimdi jaýap berýge daıyndyqty arttyrýdyń mańyzdylyǵyn atap ótti. Bul turǵyda adam, janýar jáne ósimdik densaýlyǵyn qorǵaý salalary, sondaı-aq qorshaǵan ortany qorǵaý jáne basqa da tıisti qurylymdar arasyndaǵy yntymaqtastyqty nyǵaıtatyn Birtutas densaýlyq keshendi tásili mańyzdy ról atqarady.
– Bizdiń eń myqty qorǵanysymyz – tek ǵylym ǵana emes, sonymen qatar myqty jergilikti densaýlyq saqtaý júıeleri, barlyq qajetti quraldarmen qamtamasyz etilgen, aldyńǵy shepte turǵan medısına qyzmetkerleri jáne daǵdarys kezinde óz qaýymdaryn bastap júre alatyn jergilikti kóshbasshylar, – dep atap ótti BUU Bas hatshysy Antonıý Gýterrısh úndeýinde.
Epıdemııalarǵa qarsy jahandyq áreketterdi úılestirýde Birikken Ulttar Uıymy júıesi, ásirese Dúnıejúzilik densaýlyq saqtaý uıymy, negizgi ról atqarýyn jalǵastyryp keledi.
Bas hatshy epıdemııalar men pandemııalar qaýpi artyp, gýmanıtarlyq daǵdarystar kóbeıip jatqanyn eske sala otyryp, «áreketti keıinge qaldyrýǵa bolmaıtynyn» aıtty. Osyǵan baılanysty elder Dúnıejúzilik densaýlyq saqtaý uıymymen birlesip Pandemııalarǵa qarsy kúres jónindegi kelisimdi ázirledi. Onyń maqsaty – vaksınalarǵa, emdeýge, jabdyqtarǵa, aqparatqa jáne medısınalyq kómekke búkil álem boıynsha teń qoljetimdilikti qamtamasyz etý.
– Qaýymdastyqtar qorǵalǵan kezde, bárimiz qorǵalamyz, – dep túıindedi BUU basshysy.
