Oblys ákimi Marat Sultanǵazıev jınalǵan qaýymdy jańa densaýlyq saqtaý mekemesiniń ashylýymen quttyqtap, zamanaýı talaptarǵa saı jabdyqtalǵan emhanada turǵyndarǵa sapaly medısınalyq qyzmet kórsetýge tolyq múmkindik baryn atap aıtty.
«Densaýlyq saqtaý júıesin damytý – memlekettik saıasattyń basym baǵyttarynyń biri. Memleket basshysy ásirese óńirlerde alǵashqy medısınalyq-sanıtarlyq kómekti nyǵaıtýdyń mańyzdylyǵyn birneshe ret atap ótken bolatyn. Osy jobanyń júzege asyrylýy – sol júıeli jumystyń naqty nátıjesi. Bul emhanada medısına qyzmetkerleriniń sapaly ári nátıjeli jumys isteýi úshin barlyq qajetti jaǵdaı jasalǵan. Sonyń arqasynda, árbir turǵynǵa sapaly medısınalyq kómek ýaqytyly kórsetilip, aýrýlardyń aldyn alý, erte anyqtaý jáne tıimdi emdeý tolyq qamtamasyz etiletinine senimdimin», degen óńir basshysy emhananyń qurylysyn sapaly ári ýaqtyly júrgizgen merdiger «AK Construction» kompanııasyna zor alǵysyn bildirdi.
Zamanaýı jańa emhana aýdannyń 200 myńnan astam halqyna qyzmet kórsetýge laıyqtalǵan. Kúnine 250 adam qabyldaýǵa qaýqarly. Zamanaýı medısınalyq qural-jabdyqtarmen tolyq qamtylǵan jáne alǵashqy medısınalyq-sanıtarııalyq kómek kórsetýdiń barlyq talaptaryna saı keledi. Munda joǵary tehnologııaly dıagnostıkalyq apparattar, sıfrlyq rentgen, ýltradybystyq zertteý qurylǵylary, zerthanalyq taldaý júıeleri, telemedısına múmkindikteri jáne jedel medısınalyq kómekke arnalǵan zamanaýı jabdyqtar ornatylǵan. Mekemeniń shtattyq quramynda barlyǵy 324 qyzmetker bar. Onyń ishinde 98-i dárigerlik personal bolsa, olardyń 66-sy beıindi mamandar. Orta medısınalyq personal sany – 194 adam, kishi medısınalyq personal – 24. Sonymen qatar, ózge baǵyttaǵy 8 qyzmetker eńbek etedi.
Qazirgi ýaqytta Almaty oblysynda «Aýyldyq densaýlyq saqtaýdy jańǵyrtý» ulttyq jobasy aıasynda 38 densaýlyq saqtaý nysanynyń qurylysy josparlanǵan. Onyń ishinde 13 dárigerlik ambýlatorııa, 14 feldsherlik-akýsherlik pýnkt jáne 11 medısınalyq pýnkt bar. Jobalardyń jalpy quny 8,2 mlrd teńgeden asady. Búginde 38 nysannyń 12-si paıdalanýǵa berildi, qalǵanyn jyl sońyna deıin berý josparlanýda.
Almaty oblysy
